冇幾耐之前，公開讓全球人士投票嘅「世界新7大奇迹」結果出爐，埃及金字塔不在此列，原因係唔使票選，都可以自動被保留其奇迹地位，夠晒架勢。
估唔到，嚟自埃及嘅熱刺孖寶美度同賀森加利，都一樣咁架勢，喺熱刺發展麻麻，等到伯明翰肯出手拯救佢哋出火海，美度就嫌人出手低，賀森加利就彈新隊友屎波之餘，又喺面試時乜都唔肯做，話佢哋係球壇轉會市場「奇迹」都冇乜錯。
賀森加利嫌新隊友屎波
原本伯明翰同熱刺講掂數，出價600萬鎊（約7,200萬港元）買前鋒美度，但最後伯明翰同美度喺人工上傾唔掂，據講美度開口要4萬鎊周薪，伯明翰畀唔到，結果單交易就咁泡湯。
賀森加利同美度一樣，伯明翰同熱刺亦已喺轉會費上達成共識，但佢去到伯明翰面試時，體能教練夏里斯以佢冇參加過季前集訓為由，要佢跑多兩轉，點知佢諸多投訴；咁都未算，佢甚至嫌新隊友屎波，襯佢唔起！
熱刺冇位畀佢返嚟
伯明翰領隊布魯士見到咁嘅情況，即炒佢魷魚冇面畀啦。布魯士話：「賀森加利喺熱刺只係打後備，我哋原本諗住畀個機會佢證明實力；既然佢咁唔滿意，我哋亦唔需要啲咁嘅球員。」
呢勻賀森加利真係玩番自己轉頭，事關熱刺以為已經成功將佢甩手，即羅致哈化柏林中場奇雲保定補佢個位。熱刺領隊祖爾就話要再同賀森加利傾留隊問題，但照睇都係前途似「咁」囉。