花旗股市彈咗兩日之後再插過，低位撈貨未走又中伏，高位冇減磅再輸多啲，大跌市嘅殘酷現象就係咁，如果以前受過教訓又冇吸取教訓，或者未受過教訓又唔識由別人嘅經驗吸取教訓，咁資金將會繼續被消耗，損失會繼續擴大。
以做按揭業務為主嘅AmericanHomeMortgage（AHM）宣佈冧檔，意義重大，AHM都唔掂，其他同類公司會點？一直諗落去，會越諗越心寒。
道指上禮拜五唔見咗281點，今晚應該仲有沽壓，但13000係重要支持位，守得穩，道指會喺300點內反覆波動，失守就Noeyesee，有排跌。
港股今日會跟花旗股市低開，低位守唔守得住，就要睇「六行三保」同恒生（011）嘅表現，上禮拜五好友想用呢啲股頂住個市，今日都可能會係咁。
招行C輪7433：招行（3968）上禮拜五升上28.80元，個勢有機會破30元推向34元，可以買啲招行C輪7433，現價94仙，有效槓桿率2.5倍，正股升上34元，7433應該喺1.40元樓上，正股跌穿26.30元止蝕。