今次跌市,由7月26日的高位23557起計,暫時最低係8月2日的22144,只經歷7個交易日,恒指就下跌超過1400點,跌幅6%。以一個中期調整來說,無論時間和跌幅,都未夠數,大市會繼續尋底,早前預期恒指會下跌到21800至22000水平,在外圍跌市衝擊下,港股本周會初步試底。
股市要升之時,任何壞因素、壞消息,都可以當佢冇到;但股市要跌之時,利淡消息同言論,就會空群而出,被誇張、被渲染,直到大戶完成其心目中的部署後,情況又會完全改觀。同一件事件,在升市和跌市中,可以有完全不同的看法。
趁低買貨,不用心急,雖然大戶全方位造淡,但北水南下令港股嚴重水浸,預期再下跌的幅度不會大,但一次中期性調整,總需要經歷一個較長的時間,大市在到底後,即使反彈,仍只係低位爭持上落之局,唔會立即重拾升軌,呢段營造底部嘅時間,通常會維持一個至兩個月,到時機成熟時,升浪才會再現。
上一個升市,無論係新手、資深的投資或投機者,好多都賺到第「Ⅹ」桶金(Ⅹ代表任何一個數字),而亦有好多人知道跌市遲早會來臨,在市勢火紅時,由大大注變成細細注,明哲保身,家下又可以等機會買平貨。經歷過多次大風浪,香港的投資者成熟了好多,而新手亦親身體驗到一次寶貴的經歷。
中期調整完成後,藍籌、紅籌和國企股,當然有再升的條件,而上一個浪,升到㷫烚烚的二三線股,好多仲一路喺度做緊大製作,呢類股仔,在下一個升浪中,升幅一樣可以倍計,不容小覷。在大市調整期間,作好部署,發掘明日之星,迎接下一個升浪,令財富再升級。
民安候回至3元吸納
6月底,推介民安控股(1389),當時股價2.43元,上升目標3.20元,唔使1個月,已完成目標,上周股價更高見3.68元,之後受大跌市拖累,股價一度回到3元水平,上周五收3.24元。
民安內地發展加快,可趁股價回落到3元以下水平低吸,年底前有機會賺2至3成。民安旗下的民安中國,今年已在內地新開5間分行,預期收益會大幅上升。