美國次級按揭出事消息沒完沒了，令到美股近期表現相當反覆，股民好似玩緊過山車，小啲心血都俾個市嚇死。有股民認為後市唔係咁明朗，暫時宜沽不宜買，但亦有人「漏夜趕科場」趁低吸納，咁到底家陣係咪撈貨好時機？
《華爾街日報》網上版嘅民意調查顯示，喺8550名被訪者之中，62%都話𠵱家係最好嘅入貨良機。
一賺即放
cbswsj1喺討論區留言：「股市大幅下挫正係執平貨嘅時候，我建議要有節制咁買入股票，先投放一部份資金入市，然後再等市場企穩。我覺得當股市表現反覆時，投資策略就要保守啲，趁低吸納後，一有得賺就要即刻放咗佢。」
rajeevseth亦贊同趁跌市入貨，原因係「全球經濟增長強勁利好股市長遠發展」，對於美股上月底嘅跌勢，佢覺得係因為市場反應過敏，先會引致投資者恐慌性拋售，仲話：「未來至少6個月都唔會出現經濟衰退，所以根本冇需要將資產由股市轉去債市。」
但有唔少網友就認為𠵱家仲未係時候入貨，trip2sf直言：「當見到哀鴻遍野嘅時候，入市買貨就最好嘞﹗」smann99亦認為家陣個市只係調整，仲未見底，只算係一個入貨嘅好時機，但就唔算係「最好」嘅撈底時機囉！