如果大家有睇花旗財經台CNBC，都應該知佢哋有個前高盛、做過對冲基金經理嘅主持人叫做JimCramer。特區凌晨時分，紐約禮拜五2:45pm，孫柏文喺屋企睇CNBC，就見到Cramer進入瘋狂狀態，破口大罵聯儲局局長伯南克。
大罵原因，原來Cramer從眾投資銀行嘅頭目口中，聽到花旗國嘅債市，已經到達心臟停頓嘅狀態。Cramer要求聯儲局立刻放水，如果唔放，佢怕投資銀行將會血流成河。
大家可能會問：「究竟債市停頓有幾大鑊？」如果大家要明有幾大鑊，首先就要知道投資銀行點幫啲公司出債券借錢。第一步，投資銀行會同想借錢嘅公司傾還款條件、利息等，達成協議之後，投資銀行就會保證嗰間公司，一定可以借到錢。間公司亦同時會開出稱為「債券」嘅借據畀間投資銀行，投資銀行承諾包銷。所以投資銀行亦被稱為「包銷商」。
包銷商做咗債主
投資銀行賺錢方法，就係將啲借據再賣畀投資者，從中收佣。不過如果投資者唔肯買啲借據，投資銀行因為應承咗包銷，所以要自己硬食。不過，因為投資銀行啲資金未能回籠，所以唔可以再幫其他企業借錢。呢個情況就等如債市心臟停頓，特區嘅百富勤喺97年都發生過。
今日就為大家提供當年百富勤，同今日啲投資銀行嘅對比。（見附表）
後記：大家要記得，97年百富勤輸咗2.6億美元執笠。即係，借錢畀百富勤做生意嘅銀行，都只係輸咗幾億。今時今日啲投資銀行，已借出但未賣出嘅包銷債券額，達到5000億美元，借錢畀佢哋嘅商業銀行又會點？大家要知道，直至禮拜五，所有花旗國投資銀行為自己出嘅債券買賣價，已經反映「垃圾評級」，等如市場相信啲投資銀行會執笠。大家明白點解Cramer要聯儲局立刻放水啦！
金手指網誌： http://phatdat.blogspot.com