同富商李嘉誠關係「亦師亦友」嘅梁伯韜，喺收購電盈（008）計劃失敗後，沉寂咗好一段日子，最近搵到新落腳點──加盟世界五大私募基金之一「CVC」，擔任高級顧問。正如前財爺梁錦松轉戰私募基金Blackstone一樣，呢條路似乎成為咗財金界猛人嘅新路向。
歐資嘅CVC噚日就呢單任命廣發新聞稿，高調得嚟有啲造作，最令人覺得奇怪嘅係，新聞稿裏面加插咗超人李嘉誠嘅祝福，李生仲不斷送「高帽」佢戴：「梁先生一向是金融界的先驅人物，在中國、香港和亞洲深受業界領袖的信賴。我希望他上任後事業更上一層。」
電盈或再成投資目標
其實，番薯梁只不過係擔任「高級顧問」，並唔係啲實際運作職務如董事、合夥人等等，需唔需要咁高調呢？佢第日嘅工作，係幫CVC尋求大中華區嘅投資機會，並會就已投資嘅企業同管理提供建議。華華好自然諗到，電盈會唔會係佢哋嘅投資目標、再來一戰呢？
話時話，呢間CVC同番薯梁嘅舊舖，即花旗集團有啲關係，CVC同花旗成立咗一家「CVCAsiaPacificLimited」，呢家公司幾年前向星島集團買入印刷業務。