每個人都希望有個五星級嘅家，所以阿Net平日都會上網睇吓啲名人家居，最近就見到有韓國網站上載咗唔少韓片《觸不到的戀人》男主角李政宰嘅家居照片，佢間屋簡約得嚟好有心思，當中最令網友羨慕嘅，係間屋大廳有個落地玻璃，可以飽覽超靚海景。
搜購各地家具
李政宰早前同崔智友合作嘅韓劇《AirCity》成績麻麻，但佢同傳媒講過話收視唔會影響佢嘅心情，梗係啦，李政宰屋企無論擺設同景觀都咁正，每日返到屋企真係可以忘記所有唔愉快嘅嘢嘛！據知佢喺呢度住咗超過6年，初初搬屋時乜都冇，於是佢慢慢喺世界各地搜羅家具擺設，然後用自己嘅藝術觸覺，精心擺放每件家具。
不過，阿Net發現今年3月佢接受時裝雜誌《VOGUE》訪問時，曾經公開自己嘅屋企，當時李政宰嘅家居擺設同網上睇到嘅唔一樣，唔知係佢太得閒經常執屋，定係藝術感太澎湃，要經常轉look呢？
版主：阿Net
本欄逢周一至五刊出
李政宰寓所網址：
http://kr.blog.yahoo.com/invu007/1099