以前一到暑假，好多家長都會送仔女去外國遊學，家吓風水輪流轉，個個都話北望神州，好似香港總商會主席蔣麗莉（Lily）咁，上個月帶埋三個寶貝仔女，去青海同敦煌玩咗幾日。
Lily話，揀去青海，除咗因為嗰度風景靚，最主要係佢個基金會，捐咗筆錢喺當地起學校，今次半公半私帶埋幾個小朋友，畀佢哋親身體驗當地貧困生活係點樣，等佢哋知道自己幾咁幸福，佢仲話：「咁樣嘅身教，效果好過口講多多聲！」
三仔女見識夜光杯
唔好睇少呢幾日行程，烈日當空，淨係睇相都知幾咁辛苦，香港嘅名媛只係會去置地hightea、shopping，至於香港班細路就習慣喺屋企開行冷氣打機。見到Lily親自陪埋班細路一齊去曬吓、體驗生活，真係感動。佢三個仔女亦因為呢個行程，知道乜嘢叫夜光杯，又親眼睇到陽關同玉門關，真係好過喺屋企睇書講足一百次。
Lily仲話，出發前專登請咗個老師，教仔女中文，因為佢老公係ABC，仔女喺屋企講英文，中文麻麻哋；加上大仔讀本地學校，好閉翳佢中文追唔上，更重要係中國人唔識中文，好失禮嘛！經過一輪催谷，阿仔嘅廣東話同普通話，聽同講都冇乜問題，只係不時將兩種語言撈埋一齊，搞出唔少笑話。