張栢芝為謝家添丁，誕下兒子Lucas，除了夫婿謝霆鋒寵愛有加，還令老爺謝賢（四哥）感動到一度流下熱淚。四哥每天都去醫院「巡房」，探望乖孫，他昨日大爆Lucas兩邊臉頰都有酒渦，十分可愛，一對眼睛又精靈，四哥表示稍後要給乖孫買太陽鏡防桃花。
謝霆鋒和張栢芝的愛情結晶品Lucas上周四在養和醫院誕生，全家喜氣洋洋，尤其是首次做爺爺的謝賢（四哥）和嫲嫲狄波拉更是心情興奮，兩人連日車輪轉出現醫院，探訪乖孫和新抱栢芝。
「買幾副黑超佢戴」
拉姑和鬍鬚Kong昨午3時拍拖到醫院，大約一小時後，四哥獨自乘車出現，記者蜂擁而上拍照，問到買了甚麼禮物到來，他說：「唔使帶，我帶個人嚟就得。」拉姑和四哥大約逗留了一個多小時後便結伴離開，臨上車前，四哥還風騷向記者飛吻。
記者稍後致電四哥問他往「巡房」情況？他說：「BB好犀利，佢兩邊面都有酒渦，對眼又精靈，我擔心佢大個咗啲桃花太旺，等佢大啲識行時，我一定要買番幾副太陽眼鏡畀佢戴，等佢遮吓啲桃花。」爺爺對Lucas有甚麼期望？四哥說：「我希望BB好似佢老竇咁，將來大個娶個好老婆。」
「白淨淨似栢芝」
此外，謝霆鋒的舊愛盧巧音（Candy）和同門師弟吳浩康昨日到尖沙嘴出席活動，Candy表示從報上得知霆鋒做了爸爸，她說：「我冇打畀佢，亦諗唔到送乜畀BB，佢乜都有。因為我容易病，所以唔會探佢哋，費事帶啲病菌去。」至於吳浩康就透露已傳了短訊給霆鋒恭喜他榮升父親。
關菊英前晚於銅鑼灣出席活動，剛榮升契姨婆的她透露日前往醫院探望霆鋒跟栢芝剛出生的BB，問她BB似那一個時，關菊英說：「似足霆鋒細個，有謝家鼻，好精靈，出世十幾個鐘已眼仔睩睩，面尖尖、白淨淨就好似栢芝。」
陳奕迅和太太徐濠縈昨晚帶了鮮花往醫院，二人全程笑容滿面，霆鋒經理人霍汶希還表示栢芝很快便會出院。
採訪、攝影：比華利、駱華齡、娛樂突發組
