呢幾日嘅股市風雲變色，有波幅，冇升幅，好似星期四（八月二日）咁，恒指一開就升，升三百點，之後倒跌三百點，然後又升番，最後跌咗十二點，成交額有九百七十六億幾，買賣十分熾熱。
全球股市因美國次按（subprimemortgage）債券風險而波動，引發連鎖反應，美國以外嘅澳洲、德國、瑞士、台灣，都有金融機構因投資次按債券，蒙受損失；究竟次按風潮幾時會完結呢？不妨聽一個贏家講。贏家就係德意志銀行，簡稱德銀。
何以話德銀係贏家？德銀於八月一日宣佈第二季業績，純利增長31%，冇因次按債券而受到拖累。一年多之前，德銀分析師喺巴塞隆拿一個會議上，表明次按債券有危險，其他銀行認為德銀怕死啫，仍然睇好次按市場，繼續買入。好嘞，到咗今年第一季，德銀自己不斷沽空次按債券，果然贏到笑，令其他銀行黯然失色。今日人人都知道次按唔掂啦，德銀市場部主管AnshuJain就話仍然相信德銀嘅次按債券投資策略係可以繼續落去。德銀一位分析師KarenWeaver講：「日前市場下陷似是一輛緩慢火車向前行，有排都未走畢全程！」
嘩，咁就驚啲喎，咁講法，次按市場如溫水煮蛙，將股市凌遲處死，而唔係好似一九八七年咁，股市跳樓直插，死完可以翻生。你可以唔聽德銀嘅睇法，一於趁大跌就吸納嘅，不過有時向贏家跟風好過聽信輸家之言，信德銀總好過信貝爾斯登啩？
次按風暴源於新派銀行家長於證券化，賺快錢（即fees，服務費，顧問費，承諾費，包銷費等等），而短於信貸風險評估，唔肯逐年賺息差。乜唔係啫，銀行係咁借錢畀一啲還債能力有疑問嘅人士，「生產」次級按債，擰轉頭，就將啲次按打包、證券化在市場上出售畀保險公司，對沖基金，銀行甩身之餘賺錢快夾妥。料不到subprime人客一旦失去收入，還債冇力，變成賴債（default），就會火燒連環船，逼次按債券投資者破產，散戶不可不慎。