勤達（1172）話投資墓園業，上星期五一支箭升咗84%。買唔到勤達，追搞北海（701）。勤達對上星期四公佈投資嘅墓園業務，正正係北海喺上年已經入股嘅同一個項目，北海實佔權益11.5%。成個墓園開發，估計可以提供1.8萬幅墓地及21.4萬個壁龕。不妨以墓地租價中位數20.3萬銀，同壁龕租價中位數5800蚊做參考。計計數，成個墓園完成發展，提供嘅收入高達49億銀人仔，肥過肥仔水。
又當墓園純利率60%，成壇製作純利高達29億銀，而北海應佔純利，亦講緊3.4億銀。北海總市值，不過5.8億銀咁大把。又以北海來自墓園每股潛在純利0.22元計，折合現價（0.38元）PE只係1.7倍！再講，祖國同樣面對人口老化問題，福地一樣尺金寸土，攞中位數做參考，已經保守。北海要足額反映墓園價值，要見0.6元，即係現價要升57%。
高力短炒博兩成
高力（1118）最新NAV0.81元，現價（0.52元）仲有36%折讓，無論喺建材sector或者鋼材sector當中，高力係少數仲有折讓嘅企業。又高力04年度（12月底止）見紅，但主打建材同混凝土業務回穩，05、06年度回復純利，兼持續增長。當07年度純利係咁易增長10%，到4500萬銀，PE都係得6.5倍。短打博高力20%回報，高力見0.62元，未有耐到NAV水位，預期PE仲低企7.7倍，安全到爆。
錢雋