花旗股市前晚重施故技，收市前挾高，再追多100點，但亞洲股市表現好小心，最醒係上海A股，升3.49%。
港股靠花旗股市反彈帶挈，終於升番啲，恒指升95點，重上22500樓上，但成交縮到得743億，即係話反彈乏力，下禮拜一會唔會好啲？都係要睇花旗嗰邊點搞，不過，𠵱家次按同對冲基金嘅問題搞到周圍「立立亂」，就算股市升番啲，都唔會有人咁容易信問題就咁樣解決。
呢排見好多人講次級按揭同信貸危機的影響，講嘅角度都係從投資分析出發，實際上銀行點睇信貸風險，尤其喺呢啲非常時期班banker通常會點做，大家真係知唔知？如果唔知，又點評估風險嘅影響呢？呢個禮拜試吓諗吓呢個問題，搵多啲呢方面嘅資料，大家對於𠵱家發生緊乜嘢事同埋潛伏緊啲乜嘢危機，可能會有好唔同嘅諗法。
昨日個市都係銀行股比較搶眼，工行（1398）全日都有積極買盤吸納，建行（939）同招行（3968）都唔失禮，本地銀行以恒生（011）最醒神，上過120.80元，收市雖然升少咗，但個勢好番好多。
恒生C輪7524：恒生公佈業績之後，股價大幅抽高，大行紛紛調高目標價，不過，碰啱花旗股市唔掂，股價跌番落嚟唞咗幾日，從技術走勢睇，整固都差唔多，有機會炒上去試124.40元高位，破位就睇128元，可以買啲恒生C輪7524，昨收69仙，有效槓桿率11.9倍，正股升上124.4元同128元，7524應該喺1.06元同1.36元樓上，正股跌穿117.50元止蝕。