NB魚骨底　要幾彈　有幾彈

估唔到，NewBalance都玩埋跳跳跳，新推出「魚骨支柱系統」彈弓鞋（名為NBZip8507），吸震回彈，學星爺話齋，由外到內再到番外，正係魚骨精妙之處。為推新鞋，NB仲搞埋網上遊戲，邊個最識換鞋，最有機會贏部PS3返屋企！

記者︰陸俊雄　攝影︰林栢鈞、黃子偉

魚骨底回彈防震

無可否認，NBZip魚骨型吸震支柱系統，力學原理同Nike於00年推出名為「Shox」的彈弓鞋技術有點相似。比起包到實嘅Air設計，摸得到的「Action&Reaction」感覺，更加實在。Nike採用垂直的圓柱彈弓，其後adidas都出過類似鞋底，其中有a3Microride跑鞋，全腳掌彈弓，設計構造更精密複雜。題外話，adidas更曾因彈弓鞋技術，被Nike控告佢侵犯版權㖭！
今日NB都發展彈弓技術，佢哋嘅魚骨底係一嚿膠過啤出嚟，上下層同骨柱之間完全冇接口。仲研究埋人喺跑步時，腳跟外側係先落地，而且衝力達人體重量3倍；魚骨底嘅精髓就係將呢股壓力吸收，再由外側傳到內側，轉化成回彈力，再送到腳中掌作支撐起動力量，好科學呢！

■燈光效果，唔好真係以為魚骨底會發光。男裝紅×銀（左）$750、女裝青×銀$730

■男裝藍×白$750

■女裝紅×白$730

追趕跑跳為贏Notebook

NB為咗Zip仲推出埋網上遊戲，全港得分最高頭10位，分別可得SONYVAIO手提電腦、PS3等?品。首回合係狂奔會朋友，次回合係買禮物陪罪，最後係幫手捉賊。其實唔買鞋都可以玩，但買NBZip嘅朋友仲會有多一張刮卡，隨時會有額外積分到手，贏人一個馬鼻。網頁︰ http://www.nbziprunner.com