官恩娜最愛清淡十指
「每兩個星期我就要整指甲，平時最鍾意係整清啲顏色，唔好見我後生女，其實我唔係好鍾意五顏六色，我覺得自己唔受呢啲顏色，有次整咗螢光粉紅，返到屋企成晚都睇自己啲指甲唔順眼，第二日即刻去換過其他顏色。除咗指甲要整靚靚，手部護理都好重要，我隻手好亁，人哋話隻手係會暴露年齡，所以成日都要keep住搽lotion，保持青春。」
林子萱怕痛自製彩甲
「之前試過黐彩甲一次，點知拆指甲嗰陣時，個女仔掛住同我講嘢，成把刀𠝹咗入我啲肉度，搞到成塊指甲甩咗，係十級痛。嗰次之後我就唔敢再做彩甲，改為自己畫啲圖案上去，清洗簡單好多，將手指浸落洗甲水度洗就得。呢樣都啱我呢啲貪方便嘅人。至於護手，其實我平時好少護理手部嘅，最多都係搽吓handcream。」
陸詩韻GelNail唔易斷
「我手上整嘅係gelnail，係銅鑼灣嘅Chanail贊助我嘅，每次大約整兩個鐘左右，大約兩至三星期去修補一次，呢種gelnail最大嘅優點係唔會斷，試過拉開汽水蓋都唔斷，真指甲都試過斷，𠵱家夏天我會揀啲比較淡同埋帶透明質感嘅顏色，因為會覺得young啲，兼且會容易襯衫。」
曹敏莉愛粉紅水晶甲
「我13、14歲時已經好着重護理指甲，雙手靚係女人美嘅一部份，好細個已經自己學修甲，到𠵱家可以講得係半個專家，我今日手上只係塗咗普通紅色甲油，水晶甲方面我會因應唔同場合去整，尤其隆重場合一定會整，仲係出街畀專業人士整理，最鍾意係粉紅色，唔使太花巧，簡潔為主已經好靚，唯一要求係方甲。」
採訪、攝影：魯萍、楊潔雯、卓美娟、卓寶花
