暑假已過咗一半，見到囝囝日日攤喺沙發，無所事事，倒不如去個短線旅行郁動吓。經小記努力搜羅資料後，發現$300跟團，玩到最新長隆水上樂園！係咪真係咁大隻蛤乸？睇過你就知！
記者：馮冠芝
Top1
$289☆長隆探雙熊
熱爆度：旅遊新熱點──佔地20萬平方米的長隆水上世界，間間旅行社平均都開成5個有關行程，仲要全部成團，十分勁！
抵玩位：雖然必玩必睇的3個項目都要自費入場（$100），不過加埋門票錢都比其他團平幾十蚊，亦夠彈性！承諾停留水上世界6小時，玩得盡情。除了大喇叭，記得玩埋人造漂流河，長成千幾米；仲有探吓香江野生動物世界嘅雙熊：熊貓+樹熊！
麻煩位：只包3餐、回程喺深圳羅湖城解散。
關鍵旅遊（29212282）團號：PPL02
團費：$289、$369（周五至日出發）
住宿：頤和大酒店
未計導遊費、保險等雜費，價錢因應報名時間浮動
Top2
$529☆下川島享受陽光與海灘
熱爆度：想去泰國又冇幾日假？不如去位於廣東的下川島，同樣可玩刺激水上活動同享受陽光海灘！最近山咀增設快速船，約45分鐘可達，方便好玩，漸受港人注目！
抵玩位：近似海南島度假風情，只攞2日假就玩到，對忙碌的香港人來說，幾百元買個休息，真係好抵！講明陽光海灘，外加椰樹成林，諗一諗，都想像到自己攤在沙上喝着椰青曬太陽的樣子！自費活動有海上降落傘、香蕉船、沙灘電單車等，真係同芭提雅有得fight喎！
麻煩位：團費唔包水上活動費用，如要玩4、5項，分分鐘埋單要千多元，有人認為猶如廉價版泰國，有人會覺得千多元去2日大陸團太誇，搵唔搵笨見仁見智。
關鍵旅遊（29212282）團號：XZB02
團費：$529（周一至四出發）、$629（周五至日出發）
住宿：千帆碧灣大酒店
未計導遊費、保險等雜費，價錢因應報名時間浮動
Top3
$599☆海泉灣俾魚咬死皮
熱爆度：海泉灣為港人熟悉的國內溫泉度假酒店，每間有做短線遊的旅行社都會有行程。家吓咁熱浸溫泉有啲變態，但少人就可獨霸一池，爽呀！
抵玩位：呢團住正喺海泉灣酒店，唔使浸浸吓趕返酒店咁狼狽。另外會帶大家去神秘島機動樂園（自費），有過山車等刺激機動遊戲。特色嘢係海泉灣嘅「親親溫泉魚」，會幫你親走腳上死皮，俾魚仔咬吓咬吓，十分過癮！
麻煩位：會去「蜂采林」、「快活谷」及「濠江鉅記手信店」三個疑似購物聽書點，實在有點擔心！
美麗華旅遊（25260323） 團號：ZZHF02
團費：$599（周日至四出發）、$699（周五出發）、$739（周六出發）
住宿：海泉灣大酒店
未計導遊費、保險等雜費，價錢因應報名時間浮動
