無綫首次舉辦的《最受歡迎廣告頒獎典禮2007》明日晚上舉行，《蘋果》娛樂版也率先舉辦「最騎呢廣告頒獎典禮」湊熱鬧，其實香港廣告界多年來均有不少創意十足的高水準之作，不過騎呢廣告也有不少，部份更叫人啼笑皆非，兼有熄電視的衝動。但無可否認這些騎呢廣告非常深入民心，可算是另類的宣傳伎倆。綜觀近年廣告，記者精挑細選十大騎呢之最，心情低落時一看定能令你笑開顏。 撰文：蘇芬妮
雅健牙科 對白牽強
朱咪咪一直都是騎呢廣告界的代表，繼相當經典的「三生牌鹿茸大補酒」後，最新力作當然要數於中午播放的「雅健牙科」廣告。一句完全九唔搭八的「國家要開放、思想要開放、睇牙梗係都要開放啦」，已成為廣告界經典騎呢對白，而朱咪咪由始至終保持四萬咁口的笑容，結尾陳詞再添金句「講嘢最緊要有牙力，睇牙就係要揀有實力」，牽強程度絕對爆燈。
得成僱傭 女傭搶鏡
該廣告由廖啓智及陳敏兒兩夫婦主演，廣告中的口號「得成女傭，融入家中」真的融入觀眾的家中，想不到貴為實力派的智叔，竟然都要放下金像獎最佳男配角的身份，與老婆及廣告中的女兒做出騎呢的「兩手一攤」（下圖右）手勢，絕對令人難忘。片尾菲律賓女傭」（下圖左）以唔鹹唔淡的廣東話說：「句（佢）都係我同鄉喎！」智叔一家即時回應：「但係佢係喺得成訓練出來㗎喎！」對此小記戥這位女傭相當不值，畢竟她未獲面試已被判了「死刑」，不過她的演技已獲大眾垂青，故頒給她最騎呢女主角獎，總算回鄉也有個桔。
金寶綠水 口號如一
金寶綠水廣告屹立公仔箱多年，近年更不斷推陳出新，身為女主角的菲籍女傭也不斷變樣，除了依然不停在屋中打掃外，最近更多添一名小朋友為配角念詩，實在相當騎呢。不過，廣告的食糊宣傳口號卻多年未改，依然是「認住金寶鐘，清潔好輕鬆」。不過未知是否因冒牌貨問題太過猖獗，近期的金寶綠水廣告要以普通話提示觀眾購買正貨。
康和堂活髮中心 頭髮失蹤
這廣告的騎呢之處在於其不合理情節，首先報失就應該打999，而非打去一般接線生，再者頭髮根本不可能被偷，廣告中的男士絕對是濫用了報失服務。最可笑之處就是該名接線生仍一臉認真，似乎對報失頭髮不感驚訝，繼而再接駁到這所活髮中心，都可算是一絕。不過男主角狀甚苦惱，完全交足戲，專業態度應記一功，只可惜Jackeline廣告男角Kenny實在太強而未能摘下最騎呢男主角，惟有暗嘆既生瑜、何生亮！
安信兄弟借貸 情義拉票
「情與義~值千金~」大家想起秋官？《食神》的雞姐？還是「要幫手？我哋永無托手踭」的安信兄弟？
廣告中一名周轉不寧的男子與所謂的知己舉杯暢飲，當他道出想借錢時，即被身邊人質疑其還錢能力，最後更被他嚇得逃離宴席。此時安信兄弟有如救世主降臨，一臉義氣的唱出這兩句，令人印象深刻。相信真的有不少人聽到他們的號召，而搵兩人打救呢！
奇華月餅 特技嚇人
一向大打溫情牌的奇華，今年中秋節廣告繼續起用合作無間的曾志偉及其母親參與，廣告橋段則參考志偉舊作《無間道》，創作意念方面似乎停滯不前。不過最騎呢的是手持月餅的志偉，匆忙趕到機場卻送機尾，最後惟有以擲鐵餅的方式把月餅送出，再由飛機一口吞下，其特技效果絕對可以媲美《變形金剛》。
Jackeline綠葉療膚中心 演技慘情
廣告選擇在熙來攘往的旺角街頭拍攝，除了十多人齊齊高舉雙手跳起、硬銷「有Jackeline，冇暗瘡」這句口號外，相信最令人難以忘懷的一定是片尾那位暗瘡男Kenny，他一臉頹喪側着頭致電電話公司問：「係咪電話公司呀？請問Jackeline電話幾多號呀？」Kenny演繹的那份絕望眼神、以及孤注一擲的情感，獲頒最騎呢男主角可謂實至名歸！順帶一提，該廣告更榮獲最騎呢化妝以及終極騎呢廣告，成為大贏家。
旺旺火辣燒米餅 互相噴火
旺旺推出的一系列廣告，可說莫名其妙，還要雄據午飯及晚飯時段，迫家長與小孩的耳朵受苦。
繼早前的旺旺QQ糖，小男孩淒厲地以高八度爆一句「Comeonbaby」震懾人心後，近日播出的旺旺火辣燒米餅同樣恐怖，講述兩位老人家食完火辣燒米餅後，滿臉通紅，還張口噴出火燄，其荒誕橋段直教人「火都嚟」！
清熱酷 誇張取勝
近年矢志要取代傳統涼茶的清熱酷，其廣告越來越有漫畫色彩，當眾人吃過炸蟹鉗後有人耳裏噴煙，又有人噴火，新娘子的鼻頭更立刻長暗瘡，極盡誇張之能事，不過最搞笑的就是廣告試圖以數據去力撐清熱酷已成為解熱氣之選，聲稱「99%受訪者有熱氣會再飲清熱酷」，實在令人啼笑皆非！
和興白花油 王子上陣
要數騎呢廣告成功例子，當然不得不提「白花油王子」顏福偉親自拍攝的一系列白花油廣告。福仔與鄧浩光架起打羽毛球的姿勢，打的卻是白花油，由於構思爆笑，加上廣告重播又重播，令主題曲《夢想有你》唱至街知巷聞，大收宣傳之效。
福仔乘勝出擊，去年新年檔推出新白花油廣告，廣告中他穿上搶眼黃色T恤，一邊獻唱《愛多80年》，一邊與和興大型公仔跳舞，相當爆笑。市民由開始的轟炸慢慢轉化為盲目追捧，福仔成為樂壇新貴，風頭無人匹敵。最近福仔又以自己命名的「福仔239」推出新廣告，當正和興公仔是老闆，福仔果然非同凡響！
經典廣告 百睇不厭
IQ題──有乜嘢逐漸變黑又得，立即變黑晒亦得？搬屋、搬廠、搬寫字樓，打幾號電話？咁有乜嘢好似太陽咁溫暖？所謂經典廣告，就是當你聽到其中一句對白、或看見其中一格畫面，就能如背《出師表》般將整個廣告背個滾瓜爛熟，以下8個經典廣告，大家又能背得出幾多？
