夏日燒着了！天文台發出的酷熱天氣警告已連續超過250小時，熱到爆燈，要降溫最好梗係去沙灘！游完曬完玩完一輪，肚仔餓，最好就係可以喺附近搵個就腳地醫肚。今日就殺入淺水灣、愉景灣同石澳，嚴選幾間分別適合一家大細、三五知己、二人情侶嘅沙灘餐廳，一於揀啱餐廳先再直闖沙灘﹗
記者：趙珮倩
攝影：譚盈傑、楊錦文、梁細權
Model：Hebernia、文遠
送$920香檳
我醉了，望住夕陽徐徐消失，無際的天邊瀰漫着片片紅霞薄雲，再呷一啖Moet&ChandonRoseImperial粉紅香檳，這才是享受﹗位於淺水灣的露台餐廳八月份最新推出的「紅粉醉人黃昏香檳晚餐」，可以同honey齊齊嘆四道法國菜，包送粉紅香檳，仲有淺水灣日落黃昏浪漫景致任睇，付出$1,888，honey都話值得﹗
法國多寶魚伴澳洲小龍蝦配黑松露菌忌廉汁
多寶魚燒得外面微脆，內裏嫩滑，淡淡的香草味提升了鮮香，配上以魚湯熬成的黑松露菌忌廉汁，絕對美味。當然配角小龍蝦同樣出色，既鮮甜又彈牙﹗
法式紅草莓朱古力千層脆餅
酸咪咪的紅草莓一定要與朱古力脆餅同吃，兩者味道中和後，即成極佳配搭。
露台餐廳（22922822）
地址：淺水灣道影灣園109號
營業時間：12nn-11pm 座位：105個（須訂枱）
人均消費：$600
Zaks請細路食雪糕
一家大細出街食，最怕幾個「化骨龍」將枱面啲刀叉亂咁飛，真失禮。想有餐「安樂茶飯」，一於帶晒佢哋去愉景灣最大的餐廳Zaks，2層面積超過5,000呎，面向大白灣無敵大海景，難得的是露天範圍內騰出一個角落做兒童樂園，設有木船、膠馬仔畀細路玩到夠，玩完之後仲有免費雪糕食，擔保小朋友乖乖坐定定。至於菜式方面供應亞洲及歐洲新派菜，當中以海鮮菜最為出色，碟碟size都份量驚人，足夠一家五口慢慢嘆。
炸魷魚$85
西式椒鹽鮮魷，香口軟腍，一定要蘸上特製的檸檬胡椒醬，酸酸地更好味。
Zaks（29876232）
地址：愉景灣水滸坊A座地下G04及1樓103舖
營業時間：8am-11pm
座位：320個
環境：1樓闔家歡迎，2樓小孩止步，確保有個幽靜環境給不同食客的需要。
人均消費：$150
Hemingway's吹加勒比海風
趁小朋友玩到阿媽都唔認得，不妨悄悄到隔籬享受一下加勒比海風情。Hemingway's主打加勒比海式烤肉和海鮮，所有醬汁配料全部自家製，誠意十足，加上獨有全港最齊全的Rum酒庫，可調出超過70種熱帶風情的Cocktails，美食、美酒、海風，三重享受。
烤春雞拼蒜白薯茸$115
Hemingway特飲$58
唔好嫌佢外貌烏卒卒，皆因以秘製南美燒烤汁醃製烤焗，雞肉極之惹味嫩滑，伴碟的是胡椒粒番薯茸，甜得來又有微辣，口感豐富。
Hemingway's（29878855）
地址：愉景灣水滸坊A座地下G09舖
營業時間：10am-1am
座位：170個
環境：位於水滸坊盡頭，海風勁，就算在室外都唔覺熱。交通：中環乘渡輪（航程約25分鐘）或於東涌巴士總站乘DB01R巴士（車程約15分鐘）
人均消費：$100，免收加一。
几回味 曬住食乳豬燒鵝
屹立於石澳沙灘14年的几回味，唔少朋友山長水遠都會專登入嚟幫襯，出名食乳豬、燒鵝，唔少後生仔女都鍾意包場開P，貪佢地方大，食物又大眾化。老闆黃先生近日引入了一隻陳年太雕酒，百幾蚊才得一小支，成支用來蒸蟹，毫不吝嗇：「你老闆黎生（黎智英）最近都嚟過，最鍾意食太雕蒸蟹，試過之後讚不絕口。」
太雕蒸蟹$488/斤
選用澳洲肉蟹，肉厚鮮甜，但醉翁之意只在那十幾年的太雕酒清蒸，酒味醇和甜香，滲入肉蟹每一部位，齒頰留香。吃完蟹，可要求將剩餘的太雕酒，另煮一碗米粉，極之好味。
咖喱雞麵包$198
老闆特別訂製的麵包，要幾大有幾大，外層勁脆，一刀切下，咖喱汁奔騰而流，咖喱味夠濃夠辣，甚有星馬風味。
几回味（28092112）
地址：石澳村824號
營業時間：12nn-12mn
座位：200個
環境：行幾十步就落到沙灘，地方闊落最啱大班人食飯，設有陽光花園雅座，不過𠵱個天時點都係坐另一旁的冷氣房比較舒適。
交通：筲箕灣巴士總站9號巴士或紅色專線小巴
人均消費﹕$120