馬季收爐，全港馬迷若有所失，其實今個月都有機會睇吓馬仔，事關奧運馬術賽下星期六起一連三日喺沙田馬場同雙魚河舉行預賽，馬迷要頂癮不妨一睇，望梅止渴。不過，馬術運動係上等人玩意，唔同平時入馬場可以隨便大叫、爆粗、搣飛仔，八方提醒大家如果有機會入場，記得守規矩，唔好丟架。
奧運馬術公司為免唔識嘢嘅香港人喺國際社會面前出醜，特別制訂觀賽規則，嚴格程度直迫《聖經》十誡，事關參賽嘅國際名駒隻隻係blueblood，相當唔嚇得，所以入場睇馬術要虔誠守誡，唔好犯規。香港人鍾意大聲講電話，所以第一誡就係趕絕手機，以免電話鈴聲影響馬匹集中精神，如果好似巴士阿叔咁講電話，實俾人趕走。
鮮艷服飾嚇壞馬仔
香港第一次舉行奧運項目，有份入場係身份象徵，呢啲大show係toseeandtobeseen嘅遊戲，不過馬術公司提醒觀眾唔好扮到花枝招展博上鏡，事關主角係馬唔係人，着到鬼五馬六一身鮮艷衣着，嚇親啲馬惟你是問。觀眾唔好扮咁靚，參賽馬就不限，如果見到匹馬馬尾有條紅繩，唔好以為係裝飾，其實係惡馬記號，隨時隨地起飛腳，小心。
奧運比賽全球直播，場內廣告位值錢，喺入面舉起張「平反六四」、「爭取2012普選」橫額，畀全世界人知道港人心聲最好，不過八方諗到，大會都諗到，所以場內一律禁止做任何政治騷，夠膽做後果自負。另一睇落奇怪，但唔係冇道理嘅規矩係落雨唔畀擔遮，有冇搞錯，唔通要觀眾照頭淋做落湯雞？其實係因為擔遮會阻住後面觀眾，着雨褸就最好。
雖然大會咁多規矩，但掛一漏萬未必可完全防止失禮行為，八方建議加多幾條，包括嚴禁踎低睇比賽，普羅馬迷可能慣咗踎低「刨」馬經先過癮，但呢項貴族運動暫時仍未接受呢種草根行為，大家都係坐定定好啲。
入場睇波睇馬，最好帶啲小食「口𣲷濕」，八方提醒大家咪帶紅蘿蔔，因為可能令馬匹發狂搶食；睇比賽時好肉緊要節制啲，如果你笑到好似梅小惠咁，就更加要忍住馬匹嘶叫式笑聲，否則令參賽馬匹誤會，影響表現；最後一誡，就係唔好帶《熱鬥小馬》拉屎藏入場，事關拉屎藏係所有馬匹嘅挑戰對象，帶佢入場可能會令參賽馬匹心緒不寧，引起大混亂，搞禍咗國際性比賽就弊。