今年暑假美國猛片如雲，齣齣大收，但就冇乜邊齣影評人讚得落，例外嘅只有將喺下月6日於香港上映嘅歌舞喜劇《戀愛大爆髮》（Hairspray）。話晒齣戲由cult片教父約翰華特斯（JohnWaters）舊片翻拍，更有尊特拉華達（JohnTravolta）反串扮肥婆載歌載舞，點都要畀番幾分薄面嘅。 撰文：戶川淳
荷李活歌舞片《戀愛大爆髮》故事發生喺60年代美國巴爾的摩，主角翠絲（妮琪布蘭斯基NikkiBlonsky飾）係一個肥妹中學生，佢每日都追睇人氣歌舞電視節目《大噴髮》，仲成日幻想上節目表演，但錫到佢燶嘅肥媽愛娜（尊特拉華達反串飾演）就叫佢唔好發明星夢。
翻拍添活力
點知有日翠絲被星探發掘，有幸於節目中一展舞技，仲爆大冷入選「噴髮小姐」，搖身變成萬世巨星。一心想捧紅愛女安芭（碧蒂妮詩露BrittanySnow飾）嘅電視台惡魔高層慧瑪（米雪菲花MichellePfeiffer飾），見無喇喇殺出翠絲呢個程咬金，竟想出陰招叮走佢，於是肥媽愛娜決定舉家於電視節目中施展渾身解數，同衰人大鬥法。
《戀》源自1988年約翰華特斯嘅同名瘋狂cult片，點解相隔冇耐又要再翻拍呢？因為原版後來被改編成百老匯歌舞劇，大獲好評之餘更囊括8個東尼獎，今次新版就利用音舞劇作為藍本，令影片既有原著故事骨幹，又有百老匯版本嘅活力同歡欣。
《戀》備受擊賞之處，係片中歌舞場面目不暇給，呢點絕對要歸功於拍過《湊仔型警》（ThePacifier）嘅導演亞當尚文（AdamShankman），全因佢係舞蹈家出身，有豐富舞台排舞經驗，加上影片監製係奧斯卡得獎作《芝加哥》（Chicago）原班人馬，呢個配搭點會唔勁？
化妝五個鐘
有咁堅嘅歌舞片班底，一定要搵個精通舞藝嘅演員擔演，今次監製二話不說就搵嚟《油脂》（Grease）荷李活舞王尊特拉華達。不過要從影30年嘅佢反串做肥師奶，仲要佢演番已故癡肥易服癖藝人Divine當年個角色，肥尊當初都過唔到自己嗰關，但為咗突破戲路，佢終於答應，仲要每日着住「肥肉衫」，再用五個鐘頭化妝。為咗令肥尊有個好對手，監製搵咗演過《油脂續集》（Grease2）嘅米雪菲花擔演，但由於肥尊當年並冇參演續集，因此二人從來冇合作過，直到今日呢兩位歌舞片王先有機會碰頭。
話你知：Cult片教父玩不文
《戀愛大爆髮》是改編自JohnWaters80年代執導的經典電影《Hairspray》，John在影圈來頭不小，他除了有Cult片教父之稱外，也一直支持獨立電影。John多年來拍過多部經典Cult片，最著名代表作為《PinkFlamingo》。John的電影題材專玩低俗、camp，甚至屎尿屁，也被視為BadTasteofBadTaste，不過，他在作品中卻流露出對同性戀者、易服癖者、肥胖人士及邊緣小眾人物的關心，電影情節往往大膽出位，挑戰電影尺度和主流觀眾的能耐。