早前曾提及短炒過一陣滙控嘅C輪，還將贏來的利潤統統轉買中行（3988）做「倉底」，此款讓優質股份鎖住炒輪贏來利潤的動作，星俠一直樂於為之。
有散戶問點解？其實每次炒輪能夠贏錢，星俠都尤其快感，畢竟散戶條件被動，而能從發行商手上贏錢，感覺好似成功向莊家攔途截劫，鈔票張張一樣，將之全數買入優質股份，其實是要留下一點像樣的「紀念品」。
那隻C輪雖已炒完，但星俠間中亦有瞄過幾眼，發現該輪現價仍高於當初買入價達十多格，換言之即使遲到昨日才沽，亦一樣有錢贏，反映獅子銀行公佈完業績後，股價已然轉趨回穩，不少散戶正搥胸後悔何以不趁滙控跌抵140元時出手吸納。股票，有時的確在眾人憂慮中上升，若然美國次按係滙控股價的隱憂，沒有類似包袱的國際銀行豈不是更有投資價值？即時令星俠想起下周二派成績表的渣打集團（2888）。
可重上278元高位
滙控在美國損手爛腳，但業績不跌反升兼表現強勁，主要受惠新興市場大幅增長；相反渣打則在美國幾乎全無貸款業務，而且其在新興市場投資更逐年上升，估計年內渣打旗下新興市場業務表現肯定驕人，加上渣打單一最大股東新加坡政府投資公司淡馬錫，年內已第三度增持渣打股權至14.06%，對渣打股價有一定支持作用。
渣打昨日收報259元，升0.20元，股價應可受惠業績而炒上，可重上278元高位，如果升破，目標將見300元。