「九龍皇帝」曾灶財上個月「駕崩」，今日下午3點喺世界殯儀館設靈，聽日下午1點出殯。曾灶財雖然係街知巷聞嘅傳奇人物，但聽聞佢屋企人想低調處理佢嘅後事，所以喪禮唔會公開，只畀少數親朋好友出席。佢屋企人都冇租到大禮堂，只租咗一間細房，附近花店負責人噚日同八方講，未收到送畀「皇上」花圈嘅定單。
競投至今個月14日
唔少人都估曾灶財生前嘅墨寶今後一定會聲價十倍，佢嘅最後遺作，一個由佢親手塗鴉嘅迷你兵馬俑，噚日起就喺雅虎香港嘅拍賣網站拍賣，為樂施會籌款，底價1,000蚊，競投至今個月14日止，但係噚日開始拍賣直至晚上10點，都未有人出價競投，真係要嘆一句藝術何價！
曾灶財生前好友兼文化評論人劉建威認為，皇帝大作唔會大幅升值，據佢所知，香港其實唔少人都有收藏曾灶財真迹，數量唔算罕有。但又話有人質疑「九龍皇帝」作品價值，其實瑞士早有博物館專門收藏精神病患者嘅作品，可見總有識貨之人。至於幫皇帝搞嘅紀念展，正斟緊喺中環地鐵站同幾個商場舉行，希望三個月內成事。