資深管理顧問馬主Y在福記請食午飯，慰勞一班為傷健策騎協會（RDA）搞籌款嘅義工；馬主N係協會嘅大公關，推動籌款工作，因馬主H幫過佢宣傳，於是請埋馬主H去食一餐。馬主Y身兼RDA主席，知道班義工努力為協會籌款，覺得請食一餐義不容辭。
十幾二十人坐埋一張大枱，十分親切，馬主H猛然發覺，真係落手落腳做事嘅，原來全部係女士，冇咗佢哋嘅話，馬主Y與馬主N都唔知點去落實啲籌款大計。香港女士頂起半邊天，唔到你唔信。呢班女義工唔止籌款咁簡單，平時喺屯門與薄扶林騎馬場幫助啲傷健人士練習騎馬，付出不少心血與勞力。
將近食完，馬主H話食得幾飽，先至記得要趕去薄扶林中華廚藝學院做「明火食神爭霸戰」評判，急急告辭。唱粵曲唱到出神入化嘅何太笑佢：「食完福臨門先至去做飲食評判，因住畀分太手緊喎。」馬主H話唔會嘅，評價福記、鏞記、陸羽等係一個標準，評價「出前一丁菜式」又係另一個標準，唔會混淆嘅。
去到中華廚藝學院，未輪到馬主H做評判，女工作人員請佢上八樓餐廳飲杯茶。呢間餐廳係教學餐廳，學員要以英語招呼人客，一位學員迎賓，講一句禮貌說話：「GoodAfternoon,LadyandSir!」馬主H聽到耳都側晒，導師係咁教嘅咩？怕要請劉紹銘教授做顧問至得。馬主H叫咗一杯八寶茶，幾香，幾好味道，可惜呢，餐廳實在太熱嘞，馬主H覺得好焗，呼吸困難，急忙一啖飲晒杯茶，走番落七樓。乜唔係吖，廚藝學院餐廳嘅落地玻璃窗全部向西，下面就係貝沙灣及大海，在酷熱天氣警告之日，下午西斜，太陽曬到你失魂，偏偏廚藝學院餐廳遵守環保規則，空調大概唔低過二十五度，真係難為在內學習工作之男女孩子。
由此想起，住在貝沙灣豪宅嘅有錢人家，每個月交電費，一定好融，千零兩千冇走雞。向西方大宅，唔係人人住得起，不過早期買入貝沙灣嘅，樓價賺到笑，交電費就當畀貼士啦。