無綫跟中央台合作的60集長劇《歲月風雲》雖然已播出15集，但口碑及收視僅屬一般，無綫急謀對策，除安排《歲》劇演員亮相細契關菊英的演唱會硬銷劇集外，前晚還利用《溏心風暴》大契李司棋及細契的人氣餘溫，讓她們與《歲》劇演員進行飯局，為《歲月風雲》力谷收視。
細契關菊英日前在紅館舉行兩場演唱會，無綫每晚均安排《歲月風雲》演員湯盈盈、韓馬利、駱應鈞、伍衛國及苗僑偉等輪流上台，硬銷《歲》劇劇情，擺明車馬力谷收視。
《歲》劇由一眾老戲骨如劉松仁、黃淑儀、苗僑偉及伍衛國等孭飛，雖然說60集長劇要慢慢煲，可惜播出以來始終反應平平，上周平均收視僅得29點（即約有188萬人次收看），較首周的平均收視31點（約201萬人次觀看）下跌了兩點，流失13萬觀眾，而且坊間對《歲》劇的口碑普遍麻麻，認為雷聲大，雨點小。
「長劇要慢慢煲」
有見及此，無綫急謀對策，前晚竟安排已播畢兩個月的《溏心風暴》演員大契李司棋、細契關菊英及黎諾懿等人，陪同《歲月風雲》演員如苗僑偉、馬德鐘、陳美琪、湯盈盈及駱應鈞等，與逾百名家庭觀眾在銅鑼灣富豪酒店舉行「TVB大家庭飯局」活動，希望借大細契的人氣餘溫力挽《歲》劇的收視。
三哥苗僑偉前晚在飯局中為收視下跌辯護說：「跌兩點上上落落唔出奇，𠵱家放緊暑假，啲人特別多節目，60集長劇就要慢慢煲。始終套劇同國內演員合作係一個新嘗試。」
不過大契和細契均否認被利用為《歲》劇谷收視，細契說：「唔係，只係我之前兩晚演唱會，每晚都有10個觀眾每人可以帶3名朋友嚟，我嚟支持吓啫。」大契則說：「我今日嚟食飯咋，都唔知咁多觀眾喺度，我嚟係幫《溏心風暴》落力宣傳。」記者指《溏》劇早已播完，大契說：「因為遲啲會原班人馬開拍新劇，所以要繼續keep住佢。」
世姪女冇聯絡
此外，對於大契世姪女趙嘉廸在港姐競選中鎩羽而歸，大契說：「佢入到最後5名已經好好，攞人生經驗，佢好sweet，不過佢選完之後冇聯絡，我唔係一個好auntie，都唔知佢走咗未。」
採訪：卓美娟 攝影：陳慧安
一網講盡
網友炮轟：悶到爆
標榜大卡士大製作的無綫劇集《歲月風雲》，不經不覺已播出三星期，但收視不升反跌，更慘遭網友連珠炮轟。
eiki1987：播到𠵱家都唔知佢哋講乜，悶到爆！
little-one：劉松仁演的嚴父，林峯演的二世祖，跟《西關大少》裏的某些人物劇情很相似。
yip_wing_tim：雷聲大，雨點小，有卡士，冇演技，劇情慢板。
kelvinkwok：有啲拖到長咗啲，但啲劇情好out。
死神天使：都幾刺激啦，起碼冇咁多情情愛愛嘅無聊戲份。
資料來源：uwants討論區、香港討論
