關菊英前晚喺紅館舉行尾場個唱，除咗李司棋、夏雨同阮兆祥等《溏心風暴》演員外，《歲月風雲》飾演華家三少嘅苗僑偉、胡杏兒同陳法拉等都嚟贈興兼宣傳，關菊英前夫黎小田、向海嵐同媽媽，仲有李香琴等都嚟捧場。
「要伸埋脷㗎喎」
當苗僑偉成班出場時，阮兆祥話因為開工睇唔到《歲》戲中，苗僑偉激吻湯盈盈一幕，叫佢即場做番出嚟，蔡子健想咀胡杏兒，就自薦示範，杏兒梗係縮啦，話菊姐先係主角，苗僑偉即刻問關菊英：「咁你介唔介意我咀你呀？要嘴對嘴，仲伸埋脷㗎喎，咀完你實唱唔到歌。」關菊英都想避，阮兆祥打圓場話：「浪漫少少嗰隻咀啦。」卒之苗僑偉錫咗關菊英兩邊面頰了事。慶功宴上，關菊英透露出年1月，《溏心》原班人馬開拍新劇，佢好怕如果自己再做奸角會冇突破，佢話如果佢同李司棋調轉，司棋姐做奸角，佢做忠嘅，咁會好有挑戰性。
前晚演唱會幫手做善事，屯門獅子會宣佈籌得250萬幫新界屯門區嘅白內障長者，有位譚師兄仲捐38萬同關菊英合唱一曲《愛在心內暖》。
