一位讀者Michael來電郵問銅鑼灣露天酒吧ISO即係邊間。左丁山極少去酒吧，呢間ISO其實未去過，但每次晚上經過，只要冇雨落，嗰度都坐滿人，地上滿是花生殼，據好飲兩杯嘅編輯權哥講，佢與好多人就係鍾意一邊飲，一邊剝花生，將花生殼丟落地下，感覺十分暢快，何況在酒吧露天部份飲酒，可以噴煙呢！左丁山既唔飲酒，亦唔吸煙，邊有興趣去吖。呢間吧嘅正式名稱係InsideOut，就在新寧大廈後面，到了英超球季開始，酒吧就會滿到瀉。
睇完電郵，打開《華爾街日報》，竟然見到中貿林位同學賓架Ｗ接受訪問。賓架Ｗ以前係滙豐中國部阿頭，常駐上海，後來被調往羅省（LA）做美國西岸副總裁，二○○三年在LA某餐廳竟然與左丁山相逢，可謂海外奇遇記。賓架Ｗ喺○四年就離開滙豐，退休去也，當時中貿林覺得奇怪：「佢未夠鐘，點解退休？」賓架Ｗ從來冇講，現在睇《華爾街日報》訪問就知道咯，原來佢被調回港，不再管中國業務之後，滙豐有一位波士話畀佢聽：「一年後你坐我個位。」賓架Ｗ滿心歡喜，點知跟住就冇咗秘書，冇咗原來嘅辦公室，要改坐旮旯頭，打字要請同事嘅助理幫忙，後來送佢去北美，咁就知情識趣，好快就申請退休啦。
今日賓架Ｗ貴為中國民生銀行行長（自○六年起），住在北京，形勢唔同晒，可以放膽直言，我哋先知道佢離開滙豐有呢段古仔。香港市場傳聞，正在上海上市嘅民生銀行會申請在香港上市，今個月底就宣佈半年業績嘞，預料賺十七億三千萬元人民幣，增長六成，咁嘅業績，股票自然受歡迎啦。唔怪得中貿林雖然唔係投資銀行界，都話要去北京搵吓賓架Ｗ聚舊。
朋友遇上事業/職業第二春，無論人在何方，總係好事，賓架Ｗ話自己冇MBA學位，覺得幾蝕底，但睇番轉頭，冇咪冇囉，一樣做咗銀行行長！賓架Ｗ公子在芝加哥大學畢業，不妨讀番個MBA畀父親睇吓！