話說半年前，梁奕倫（Roland）於《亞洲華爾街日報》看到一篇報道，就去幫襯容哥開設的食店，更發現容哥竟然大有來頭，原來他是前菲律賓總統馬可斯的私人廚師，攀談間更覺他風趣健談，於是邀請他上自己的電台節目教煮餸，今日Roland特地帶埋Fans齊齊向容哥請教煮食秘訣。
記者：林佩婷
攝影：陳偉強
烹飪指導：容記小菜王主廚易偉容（23871051）
髮型：Heoi@LaBoutiqueSalon
姓名：梁奕倫
入廚經驗：2年
最拿手菜式：赤小豆粉葛豬骨湯
最勁紀錄：煮畀10位屋企人食，阿媽話感動過日後Roland結婚。
姓名：Karman
入廚經驗：10年
最拿手菜式：蒜茸粉絲蒸蝦
最勁紀錄：煮過畀16位家庭成員食。
姓名：Holly
入廚經驗：12年
最拿手菜式：豆豉燜雞翼
最勁紀錄：去Camp同幾個朋友包辦近40人食用的盆菜。
XO醬韭菜花小炒王
0hr10min
份量：4人
好多時食韭菜都會有渣，容哥就話因為韭菜的尾端較老，最好只用前端來炒，夠爽脆，但覺得非常浪費，所以他說尾端用來炒蛋較適合。
材料
韭菜花11/2斤（切頭3吋位）、大蝦亁10隻、急凍土魷1/2隻（切條）、XO醬1/2湯匙、蒜茸2粒、油少許
做法
1.燒熱油，用蒜茸爆鑊，加韭菜用中火炒2分鐘。
2.加入蝦亁、土魷及XO醬炒多2分鐘便成。
貼士
記得不能太猛火，否則韭菜花未熟透但外表已燒焦。
蝦子肉鬆蒸豆腐
0hr10min
份量：4人
這個菜味道清淡，最啱夏天食。容哥話豆腐加少許蝦子和肉鬆，可令豆腐入味但又不太鹹，這個配搭最好。
材料
百福豆腐1盒（切8片）、蝦子1/2茶匙、肉鬆1湯匙、大蝦亁10隻、海鮮豉油少許
做法
1.依次序放豆腐、肉鬆、蝦子及大蝦亁上碟。
2.水滾後放入鑊以大火蒸5分鐘，淋上海鮮豉油便成。
貼士
豆腐不能蒸太耐，否則會老，質感變「嚡」。
蝦膏蒸腩肉
0hr25min
份量：4人
好多人食腩肉都喜歡肥，但容哥卻偏偏選擇半肥瘦：「因為瘦肉蒸得耐會嚡，半肥瘦的腩肉有很好的口感，而且我為年紀較大、很喜歡食但又怕膽固醇威脅的人着想。」
材料
半肥瘦豬腩肉1/2斤（切件）、豆卜10粒（切半）、蝦膏1湯匙、葱/生粉各少許
做法
1.豬腩肉加蝦膏及生粉拌勻醃5分鐘。
2.依次序放上豆卜及豬腩肉，水滾後以大火蒸10分鐘。
貼士
蒸時可用毛巾冚實鑊蓋邊，以免走氣。記得豆卜切口一定要放向上，這樣才能吸收腩肉同蝦膏的汁料。
上湯煎鯪魚
0hr20min
份量：4人
容哥話現時鯪魚當造，不過由於太多骨，一般人不易食，但有些街市有預先去骨的鯪魚釀上鯪魚肉賣，那就方便很多。
材料
鯪魚連鯪魚肉1條、上湯1罐、蒜茸/葱花各1茶匙、生粉/水各1湯匙、油少許
做法
1.燒熱油，放鯪魚慢火煎5至8分鐘，隔起多餘油。
2.原鑊爆香蒜茸及葱花，加上湯煲滾後轉細火，放入鯪魚，用蓋焗5分鐘。
3.拎起鯪魚上碟，於湯內加生粉及水慢慢搞勻埋芡至杰身，淋在魚上。
貼士
生粉水不能一次過倒入湯中，否則高溫會令生粉立即凝固，影響埋芡。
問料最緊要
Holly
Q：點樣煲湯先有湯味？
A：材料足，想要多鮮味可以加亁瑤柱，要大火煲滾一段時間，唔好一煲滾即轉細火。
Karman
Q：點樣打芡先打得靚？
A：生粉同水比例約1：1，邊倒邊攪勻。
Roland
Q：點洗蜆令佢無沙？
A：將蜆擲一次，找出只有沙的空蜆，之後再於煮前3小時加水過蜆面，令其吐沙。
Esther
Q：煮芝士龍蝦伊麵會一嚿嚿？
A：先將伊麵煮腍，再以細火慢滾焗住，芡汁不能太杰身。
Eva
Q：煎魚點先唔會燶？
A：用易潔鑊，於煮前記得燒熱佢。
多得Gigi姐本煲湯書
看到Roland身形咁纖瘦，以為對食好揀擇，但他說只要地方亁淨，大牌檔都照食可也：「我最鍾意煲湯，記得兩年前Gigi姐（黃淑儀）出咗本書，佢送咗本畀我。我諗住唔好嘥，就照住食譜來煲湯，煲煲吓就煲上癮！但一個大男人拎住本食譜去街市買餸覺得好瘀，所以我死記晒材料先去買，成日都要行幾轉。記得第一次買粉葛，批皮批到我死，喺電台同聽眾講，點知有人Fax入嚟話原來街市有得幫我批埋皮。煮的過程中，我亦體會到母愛的偉大，因為每餐諗三餸一湯原來真係好辛苦㗎！」
前馬可斯私人廚師易偉容
入廚經驗：38年
最拿手菜式：韭菜花小炒王
威水史：曾是前菲律賓總統馬可斯私人廚師，其開設的餐館曾於02及05年被《亞洲華爾街日報》評為香港最佳餐廳之一。
買定料 王菀之明日同你煮餸
秘製雞翼
雞翼2磅、紅葱頭1/2個
滑蛋蝦仁
中蝦1磅（約8至10隻）、雞蛋6隻、花奶3茶匙
食出溫情雜錦湯
冬瓜11/2斤、瘦肉1/2斤、鹹蛋2隻、烏冬2包、魚皮餃/豬肉丸各1打
帆立貝白汁意粉
半殼帆立貝2隻、意粉300克、白菌100克、忌廉汁60毫升、白酒/巴馬芝士各少許
帆立貝可用有殼或冇殼，有殼賣相較精緻。帆立貝要去腸，但橙色部份是肝，可以保留食用。
