每年暑假都總有學生誤墮暑期工陷阱，香港青年協會青年就業網絡單位主任張志偉指出，青少年學生求職心切，而且看重薪酬，是容易「中招」的主要原因。「模特兒、配音員、金融投資公司文員同埋娛樂場所文員都係高危陷阱，學生見呢幾類工作時要特別小心。」
求職前要了解工作性質
「有個學生去見工做配音員，結果間公司要佢交幾千蚊學費上堂，上完堂後並冇安排到工作畀佢。」張志偉指今年便有一個誤墮配音員工作陷阱個案。香港討論區網民rimiko亦有類似經驗：「近日我見咗份配音員，間公司話要我錄音造隻光碟，畀公司揀人，要收我500蚊。」她懷疑受騙最終未有付款。
本身是註冊社工的張志偉表示：「有公司話請模特兒，但同樣先要你交錢上堂。有公司話請文員，其實係層壓式推銷，要你帶錢買貨，有啲就係呃你投資。」張志偉建議青少年求職時必須了解工作性質，遇有問題應多與家人商量。「如果份工薪酬同要求資歷不對稱，求職者就要小心，返工時發覺公司有古怪，應堅決果斷即刻離開，唔使驚。」
本報記者