HappyFriday與友人狂歡兼睇午夜場，完場後損友提議過大海掃埋澳門菜，但佢醉翁之意只在賭！夜貓子一向賭運平平，但對澳門菜就好憧憬！幸而夜貓子發現香港都有葡式自助餐，手中的電影票尾更可當成折扣入場券！咁着數，夜貓子當然唔會走寶！
記者：馮冠芝
攝影：陳偉強
Model：Ava
唔理孤身過大海的損友，夜貓子與3名友人剛剛好，食完更可以打幾圈衞生麻雀！去到今次消夜主角太子酒店香味屋，4人同行仲可獲3人價錢的優惠！唔計加一，每人都係$111。或者每人手中1張電影票尾，不論院線電影，只要所持戲飛的日期為最近12日，即有八折！咁抵食，即使係由晚上10點先開始，都唔驚肥豁出去，講多無謂，在2小時內狂掃50多款食物最實際！
5種海鮮任你食 葡國焗海鮮
遠處飄來的椰香吸引住夜貓子，一瞥其金黃色的外層下，有澳洲青口、新西蘭青口、日本蝦、三文魚、龍脷柳，像黃金下的不同寶石。葡汁香甜，襯出「寶石」的鮮，椰絲增添口感味道，整道菜如寶藏。
芫荽蒜茸炒沙白
沙白比蜆大少少，夜貓子咬了一隻，發現佢肥大肉厚，一粒沙都無！芫荽蒜茸的香口隨之滲進口腔，惹味得嚟唔會搶走沙白的鮮味！再咬發現口中脆卜卜！又話無沙？當然，脆口的是沙白面上的炸蒜，以惹味為此菜畫上休止符，正！
葡國雜腸
以前葡萄牙人航海，以香腸為食糧，貪佢方便易保存，所以其香腸落較多鹽，以延長保存期！這兒的豬肉腸、豬肉牛肉腸亦然，保留其濃味特色。食時配合以白酒、雞湯煮過的椰菜及薯仔，清甜的蔬菜汁化解了香腸的鹹，一切剛剛好。
馳名水蟹粥
唔止魚得貓心，連蟹亦教貓傾心！客人即order即煲，新鮮水蟹生滾粥呈上！肉鮮甜粥水綿，呷多幾碗也不嫌多。
自助餐三寶
食自助餐，點少得三寶：生蠔、刺身、壽司！這裏選用智利生蠔，鮮甜又creamy。「拖羅」甘香，脂肪魚肉呈黃金比例，三寶攞滿分，連腌尖的夜貓子也無嘢彈！
葡撻
喜歡葡撻的焦糖香脆，卻害怕其太甜膩！但這葡撻選用了脫脂奶，清甜不膩，保留香脆，教夜貓子愛不釋手。
木糠布甸
這個木糠布甸有3層「木糠」，瑪莉餅磨成碎粉中和布甸奶膩，木糠牛油香與布甸呍呢拿香交戰！賽果，當然是多來一客。
環境
實木色的椅桌，配上異國風情裝修，令人感染其熱情。座位間夠寬，非常適合一大班朋友嚟食。食得開心之餘，夜貓子更發現連這兒的侍應也如美食般出色，好像侍應Fung站在夜貓子旁，教夜貓子差點對他……手上的葡國焗海鮮飛擒大咬。
馬可孛羅太子酒店香味屋
地址：尖沙嘴廣東道23號太子酒店3樓
電話：21136046（自助餐宜先以電話預訂）
價錢：成人$138、小童$78（星期日至四）
成人$148、小童$88（星期五、六、公眾假期及其前夕）另設加一服務費
座位：151人
供應時間：10:00pm-12:00mn
邂逅多國蟹菜
若驚消夜食肥人，咁不如星期六去沙田踏吓單車，減輕幾両再戰多國蟹自助餐吧！麗豪酒店推出多國蟹菜，中、日、墨西哥煮法樣樣齊；蟹天婦羅、清酒蟹、蟹餅等，竟直當蟹兄係殺父仇人咁由頭到腳吞佢落肚。一家大細去食記得帶渣打信用卡，可有六折優惠，食得開心又省一大筆！
海鮮拼盤
選用珍寶阿拉斯加蟹、日本鱈場蟹、澳洲龍蝦仔等海鮮，清煮後冰鎮，保留到海鮮鮮甜，原汁原味口感清凉，像飄浮於海洋中心，即使夏日亦透心凉。
牛油果蟹肉沙律
蟹箝啖啖肉，配上青瓜、牛油果，爽、脆、軟、腍多種口感於口中交戰！蟹肉鮮甜，fresh的感覺四溢。
麗豪酒店濠餐廳（21321040）
地址：沙田大涌橋路34-36號麗豪酒店3樓
價錢： 成人$298、小童$208
(星期五至日、公眾假期及其前夕)
成人$268、小童$188(星期一至四)
供應時間：6:30pm-9:30pm