孫柏文問大家：「今時今日，究竟對冲基金、特區的士高、牟利幼稚園有乜共同點？」大家會點答？
如果係《金手指》嘅fan屎，睇見對冲基金同特區的士高，應該會估佢哋嘅共通點係，呢排都有好多間同時執笠。Fan屎亦會將邏輯伸延，估到牟利幼稚園都一樣。噚日，《蘋果日報》都有報道關於幼稚園倒閉嘅事，其中講過私立獨立幼稚園協會主席胡肖霞女士決定執咗轄下荃灣聖德肋撒幼稚園。
孫柏文作為獅子山學會嘅研究總監，年初被私立獨立幼稚園協會邀請參加一個活動，畀個機會我去分享，我對點樣爭取幼稚園學券可以用喺牟利幼稚園身上嘅見解。
最令我印象深刻嘅事，發生喺活動之後嘅一個晚宴之中。當時，我要去洗手間，就問胡主席，洗手間喺邊度。胡主席答嘅時候，好詳細咁教我點樣行、去到邊度要轉彎，指示清晰，令孫柏文深深感受到，呢一班幼稚園教育工作者每日對住學生嘅嗰份愛。如果可以搵到女仔肯同我結婚生仔，我絕對希望可以有胡主席般嘅教育家，去培育我嘅小朋友。
所以我睇到嗰段新聞嘅第一個反應，就係覺得非常可惜。不過，最可惜唔係胡主席執咗間幼稚園咁簡單，而係背後嘅理由。當時嘅李國章局長推行「毒學券」，因為家長唔可以用學券選擇「牟利幼稚園」，所以令好多家長面對龐大利誘，去歧視啲教小朋友教得好好，面對10%盈利上限嘅「牟利幼稚園」（「非牟利幼稚園」嘅盈利上限係5%）。李國章局長毒死咗啲教得好嘅幼稚園，又再一次損害無法脫離本港制度嘅小朋友嘅未來。
執笠非因教得差
一班每日喺前線教育小朋友，培育我哋香港未來嘅教育工作者，唔係因為教得唔好而要執笠，而係因為新任局長孫明揚未能（唔想？）撥亂反正，唔可惜咩？
一對夫婦，生仔生女，基本上只會有一個希望，就係希望仔女長大咗之後，可以自力更生、為社會作出一點貢獻。培育小朋友係一個十年二十年嘅工程，我作為一個29就嚟30歲嘅人，政府真係覺得我對香港教育制度有信心到達可以考慮生兒育女咩？大佬，點生呀？
後記
多謝王冠一兄嘅安慰，正當孫柏文被網友打到口腫面腫之際，冠一兄用文字出嚟扶一扶我，孫柏文深感多謝，而令我安慰嘅一句，就係冠一兄話星期一沽滙控，勝負孰未可料！
金手指網誌： http://phatdat.blogspot.com