何止港股神乎其技，美股同樣出神入化！周三臨收市前20分鐘（美國東岸時間下午3時40分，即香港周四凌晨），道指本來仲跌緊60多點，豈料突然來個大翻身，短短時間大幅飆升超過200點，收市倒升150點，班淡友當堂倒瀉籮蟹，面無血色。為甚麼個市神經質至如斯？是挾倉？還是托市？
原來全部唔係，據聞是臨尾市有人落錯盤，本來買50張期指，點知落盤者手震震㩒多兩個「零」，變成買5,000張，汝道現貨市場又怎會不即時作出反應──投資者飛撲入市掃貨？道指成份股差不多全面報升，這個傳聞，閣下信嗎？
信不信由你！不過假若傳聞屬真，落盤者或其公司最好求神拜佛，望周四美股開出一定要升，因為如果「插水」，手震嗰個跳樓都唔掂，間公司更可能隨時「執笠」。然則個市真係升，閣下又信唔信係落錯盤？
還記得筆者時常提及的「無形之手」嗎？呢隻手自去年美國中期大選前，已開始不停掃高美股，故道指「無厘頭」屢創新高。冠一以為共和黨一敗塗地後，隻手會消失於無形，豈料鍥而不捨之餘，還越掃越高越起勁，從而締造了一齣「不滅神話」。
可惜因次按信貸泡沫爆破，誘發套息交易（carrytrade）拆倉，令美股搖搖欲墜。還幸「無形之手」分段力托，有時用埋隻「無影腳」刻意踢高，如有跟貼市之士，必知道筆者所言非虛。
那麼這「無形之手」是誰？據江湖傳聞，「怪手」乃在列根總統時代，於「87股災」時製造，用意不言而喻──在非常時刻出手，肯定快兼且有效過甚麼財政或貨幣政策多多聲！
嘩！這豈不是干預自由市場嗎？
唔好發夢啦！呢個世界真係有自由市場咩！