昔日中港電訊股管理層，似乎都好留戀電訊或信息營運呢行，好似曾先後出任網通副主席同首席執行官、亦擔任過8號仔非執董兼副主席嘅田溯寧，由噚日起成為聯想（992）非執董，每年有近110萬港銀（14萬美金）袍金連酬金落袋。
另外，現任中信1616（1883）主席嘅石萃鳴，之前做過中移動主席，一手將間公司湊大上市，中移動家吓嘅市值直迫滙控（005），成為散戶至愛藍籌之一。噚日中信1616業績記者會上，有人問中移動股價已升至90元高位，未來股價點睇？佢就話對舊舖好有信心，業績表現應該唔錯，股價繼續有得升咁話。
阮紀堂識撈
同場加映，曾經係香港電訊（8號仔前身）副行政總裁嘅阮紀堂，𠵱家係中信1616行政總裁，問佢對母公司中信泰富分拆大昌行有冇好消息？佢即勁hardsell，拎起枱上嘅天然泉水話：「今日放喺枱上嘅水，就係由大昌行代理㗎！」