噚日個市，大上大落，先高開，中段大插，午後反彈，每一個浪都幾百點上落，好耐未見過咁大波動嘅場面。
恒指高開，上到22767，升312點，但升勢好短暫，跟住由高位一路插落去，最低跌到22144，中午收市時倒跌310點，個幾鐘頭內，恒指又大跌超過620點，股仔嘅跌勢仲急，好多都質低十幾廿個價位。
午市跟外圍反彈，恒指唔單止收復失地，仲升過一陣，尾市好淡爭持，恒指埋單都要跌12點，但期指低水就略為收窄。大市跌勢未止，短期雖然會因跌得太急而出現反彈，但彈完都係要再落過，暫時睇22000至21800會到底。
二三線股終於出現較全面性嘅拋售（唔算恐慌），最低潮之時，好多都跌超過10%。早前個大升市，二三線股百花齊放，日日係咁升，升親都係十幾至幾十個巴仙，家下大市中期調整，股仔當然要回，甚至由高位回落幾成亦好正常，有升必然有跌，呢個係必然嘅過程，而現時嘅調整，亦可以話係為未來的另一個升浪而鋪路，調整得越「健康」，日後升幅越大。
H指下跌136點，但國企同中資股榮辱互見，內地銀行股已有喘定之勢，建行（939）、工行（1398）同招行（3968）都逆市而升。建行收5.66元，升3仙，6隻內銀股中，建行好抵買，可趁低吸入，中線持有，年底目標價6.50元。
回歸A股下半年成事
上禮拜一，建行最高曾升上6.08元，現時由高位已回落7%，並跌穿10日同20日線（同在5.83元水平），噚日最低落到5.53元，守唔守得住，係關鍵，若收市跌穿，有機會落到50日線（約5.30元）執平貨。
建行會跟大隊回歸A股，下半年可成事，預計會發行不超過90億股A股，以現時股價計，可集資約500億元。為避免發行新股對股本回報產生攤薄效應，建行除派發07年的中期息外，並會向H股股東派發至07年6月止的所有滾存的未分配利潤，估計合共會派息0.25元，半年息率有4.4厘，估計A股上市同派特別息前後期間，股價可再創上市新高。