娛樂圈近日喜事一宗接一宗，繼徐子淇上月為恒基兆業太子爺李家誠誕下千億B女後，張栢芝昨日也在養和醫院為丈夫謝霆鋒順產誕6.5磅B仔，難怪奶奶狄波拉和老爺謝賢昨日到醫院探望時全程蓮子蓉口面。栢芝的前經理人中國星昨日更就公司與栢芝之間的訴訟發出聲明，指雙方已經和解，栢芝今趟可謂雙喜臨門。
現年27歲的張栢芝，於去年9月與謝霆鋒在菲律賓結婚後不久即懷有身孕，前日栢芝入住養和醫院待產，昨日已順利為霆鋒產下金豬仔，為謝家開枝散葉。一向喜歡小朋友的栢芝，早前接受訪問時，更表示生完這一胎後仍會繼續努力，仔女越多越好，完全無懼生完BB後身材會走樣。
爺爺開心
「好似霆鋒細個嗰陣」
謝賢（四哥）和狄波拉（拉姑）昨晚一直在產房外等候喜訊，而霆鋒則陪伴栢芝進產房，昨晚四哥向本報記者親證栢芝順利自然分娩誕下男嬰的喜訊，他在電話中說：「係個男嬰，有啫啫，BB重6.5磅，栢芝噚晚作動，就由霆鋒陪佢入醫院，結果今晚9點40分BB就出咗世，護士將瞓喺玻璃箱嘅BB推出嚟畀我哋睇，仲特別揭開畀我哋睇，係個仔。BB好精靈，母子都一樣健康，BB好多頭髮，好似霆鋒細個嗰陣時。」問到霆鋒現時心情如何？四哥說：「佢𠵱家好忙，仲喺房陪緊栢芝。」栢芝可是自然分娩？四哥說：「係，佢痛咗一陣就順利生咗，佢好叻女。」
其後四哥與Mani於晚上約10時45分離開醫院，問栢芝是否已生下BB時，四哥笑說：「係呀係呀！我梗係開心啦！其他嘢Mani會同你哋講㗎啦！」Mani則說：「栢芝晚上9點幾生咗個仔，重6磅8安士，係自然分娩，母子平安。BB臍帶係由霆鋒剪嘅，但個BB改乜嘢名就仲未知。」
由於霆鋒是四哥與拉姑的長子，故兩老對栢芝這一胎尤為着緊，昨日二人在栢芝待產期間頻頻進出醫院探望媳婦，為栢芝打點，忙得不亦樂乎。榮升祖父母的拉姑和四哥昨日心情靚絕，但初為人父的霆鋒，未知是否因大日子仍要開工的關係，昨午一直木無表情，下午3時許他離開寓所前往西貢成豐片廠拍廣告，逗留至下午約5時半才急急離開，直奔養和醫院陪伴愛妻。
昨日有近60名傳媒到養和醫院採訪，單是中港台三地攝製隊已有10隊，霆鋒特地請來三名保安維持秩序，但加上醫院數名保安仍控制不住混亂場面。昨日下午約1時，拉姑與丈夫鬍鬚Kong及四哥乘車抵達養和，在場記者即上前包圍拉姑，追問栢芝是否順利產下BB，拉姑見狀即豎起手指說：「如果生咗，我會通知你哋。」
拉姑和鬍鬚Kong於下午約3時離開，然後又於5時半左右折返，傳媒爭相採訪拍照再度引起混亂，有電視台攝製隊的攝影機更撞到拉姑的頭，雖然痛得她即時大叫，但拉姑不但未有怪責，而且還笑容滿面，準嫲嫲心情明顯勁靚。
雙喜臨門
與中國星官司和解
此外，記者昨日致電四哥詢問他首次榮升爺爺的心情時，他說：「我係好開心，但心情一啲都唔緊張，栢芝都一樣，佢好鎮定。」乖孫改了名字沒有？四哥說：「冇喎，留番霆鋒佢哋改，我哋都唔使跟族譜。」
傍晚時分，霆鋒的經理人Mani抵達醫院，透露霆鋒已告假兩星期陪伴栢芝。栢芝弟弟張柏文昨晚約8時抵達醫院，他面對大批記者時諸多迴避，又一度向記者發難爆粗，更說：「我唔係睇家姐，我嚟睇醫生啫！」EricKwok和女友葉佩雯也於約8時到達醫院，問他會否認BB做契仔，他開玩笑說：「我認番BB做契爺。」
與此同時，栢芝前經理人中國星昨日發出聲明，透露月前入稟高院控告中國星違約並追討1588萬元的栢芝，已於6月12日撤銷訴訟，雙方已在和平氣氛下達成和解協議，為免外界有不同版本揣測，雙方同意發出聯合聲明，以免破壞過往合作關係。
採訪、攝影：比華利、娛樂突發組
相士話：幕前發展機會微
張栢芝昨日為謝霆鋒誕下愛情結晶，記者致電幾位堪輿學家，查詢二人的BB命格如何時，沒想到這個生於演藝世家的BB，原來不適合在幕前發展。
蘇民峰：今日係屬土嘅，如果生女嘅話就會特別着數，一世好運。至於男仔嘅話，就會一生平穩，可能會喺大機構做事。
區仲德：今日出世嘅BB仔命格屬土，因為夏天出世，算係命旺，個性比較沉實，多做事少說話。佢嘅命格火重，有三粒母星，老竇（謝霆鋒）可能同時有三個女人。佢有一粒演藝星，將來有機會入娛樂圈，但會做內部策劃嘅工作，幕前演出機會較細。
鄭智恆：佢嘅性格比較自我同硬頸，心地都算唔差，講嘢直腸直肚，有啲似老竇嘅性格。佢唔適宜入娛樂圈，打政府工或跨國公司比較適合。
話你知：生仔最低消費$32,000
張栢芝昨日在養和醫院生產，養和的分娩套餐分自然分娩及剖腹取嬰兩種，前者4日3夜住宿私家病房的收費為$32,000，後者6日5夜則收$43,800，費用由分娩日開始計算，但所有兒科醫生、婦產科醫生及麻醉科醫生的收費並未計算在內。
一般來說，套餐收費已包括基本檢查及藥物的費用，不過院方也會根據孕婦情況而作出調整，若要求丈夫陪伴進產房或需要選擇時辰開刀，則要另外收取附加費用。
