美國著名網站雅虎（Yahoo!）近年業績下滑，創辦人楊致遠早排臨危受命，重掌行政總裁（CEO）職位；不過，《華爾街日報》調查發現，有51%網友認為楊致遠難以改善雅虎業務，只有31%人睇好佢。
jdfree喺《華爾街日報》討論區話：「雅虎不但技術落後，仲冇乜創意，業務好難翻身，睇怕會繼續俾主要對手Google搶生意，股價將持續下滑。」
技術落後致命傷
TORAKOASHINO401講：「雅虎嘅致命傷係搜尋引擎技術落後，如果呢個問題唔解決，無論邊個做CEO，雅虎都好難再發威。」whyzanflut講笑咁話：「雅虎只有一條生路，就係俾Google或者微軟（Microsoft）收購。」
JoshSladowsky反駁：「雅虎嘅電郵服務好受歡迎，楊致遠應該鼓勵電郵用戶多啲採用雅虎嘅網上搜尋服務，咁就可以改善業績。」
過去6季，雅虎業績有5季令人失望，06年初至今股價累積跌咗四成。楊致遠早排話：「我會喺未來100日構思一套長遠嘅策略，假以時日，外界會對雅虎另眼相看。」不過，Forrester研究公司分析師CharleneLi就唔係咁睇好，認為楊致遠缺乏管理大公司經驗。