徐淑敏和王貽興早前曾傳出緋聞，昨日兩人難得同台演出，雖然未有表現尷尬，還齊聲否認戀情，尤其向來甚少提及中坑男友的徐淑敏，竟高調講男友，還謂自己高攀不起王貽興，實行跟他劃清界線。
徐淑敏（Suki）和王貽興昨日齊齊在尖沙嘴為滑浪服裝品牌擔任開幕嘉賓，兼任模特兒行天橋，大會即場送贈潛水衣給他們。
雖然兩人早前曾傳出緋聞，但昨日見他們明顯未有避忌，Suki自言甚少行天橋，幸好有私人更衣室，但她見到其他男女模特兒即場換衫，令她有點尷尬。
睹換衫即面壁
Suki說：「見佢哋換衫，我即刻面壁，唔敢睇。」問Suki與王貽興同台演出可會尷尬？她說：「工作還工作，唔想畀緋聞繼續咁，我同佢私底下都冇聯絡㗎。」
對於被指翻撻王貽興，Suki說：「根本就絕對冇撻過，絕對冇可能，佢唔係鍾意我，等我八吓佢鍾意邊個先。我由始至終都係得嗰個，況且我高攀唔起王貽興，佢係才子，總之就唔係佢喇，強烈堅決否認係佢。」問到與王貽興合作，會否事先知會男友？她說：「都唔需要同佢講，咁工作還工作。」
慣被靚女拒絕
王貽興得知慘被女方堅決否認緋聞時，他說：「大家可想而知就係冇可能啦，我根本都唔係佢鍾意嗰類型，所以諗都唔使諗，況且我由細到大都俾靚女拒絕慣，多一次唔多，少一次唔少。」對於女方指高攀不起他，王貽興說：「佢都儲到錢買MiniCooper車，我就連二手都買唔起，邊個高攀唔起邊個呀？」
採訪、攝影：王崇穎
