因道瓊斯股票交易，俾美國證監會話可能提出民事訴訟嘅東亞（023）主席李國寶，真係冇乜嘢風浪未見過，噚日佢間寶號公佈業績，記者會照開，人照到，寶哥哥心情一啲都冇受影響。
之不過，對於一切關於道瓊斯案嘅提問，寶哥哥就有備而戰，閉上金口，乖乖咁聽晒律師吩咐，「我律師話完全唔可以同啲人講……今日係講業績，唔係講我personal嘅嘢」。至於個人官非會唔會影響東亞業務？答案就梗係「完全冇影響」。
借尹焰強把口
作為華資行龍頭嘅東亞，寶哥哥一向為同業抱打不平，明示暗示啲「大隻外資行」（據估計係獅子行），享盡不公平優勢嘅言論，就連路人甲乙丙皆知。但估唔到連佢底下，一貫溫柔敦厚、人生閱歷無數（曾在南亞海嘯大步檻過）嘅財務揸弗人、東亞財務總監尹焰強，都獲授老闆尚方寶劍，暗寸剛公佈中期業績嘅大隻行母子，靠一次過項目「帶挈」盤數。
Daniel（尹之洋名）話，東亞嘅盈利，大部份係正常核心業務賺番嚟嘅利潤，正所謂每分錢咬開都有血有汗，「唔係其他銀行咁，有exceptionalitems（特殊項目）」。此言一出，台下分析員及記者皆發出會心微笑，事關盈利創新高嘅滙控同恒生，雖然基本功都好勁，但令證券界驚喜嘅「不敗之謎」，始終要靠非核心項目取勝。
陳棋昌輕鬆撐場
剛退休嘅東亞前執行董事陳棋昌，噚日以東亞中國副董事長身份，悠然自得坐喺台下，主席台就多咗首次坐上去嘅東亞中國執董余學強。
[email protected]
