噚晚六合彩如果一注獨贏會有4500萬，不過，對比起敦沛金融（812）嚟講，真係話咁易賬面賺夠近9000萬。點解咁講？事關呢間公司7月底用500萬銀入股創業板公司華普智通（8165）5.59%或5000萬股，每股入股價只係1毫子。
三年後復牌飆54%
唔知係敦沛眼光奇準，定係華普智通經過股權重組後，予投資者無限憧憬，停牌成三年多之後，噚日一復牌，即火箭咁爆上最高2.2元，收市仍飆54%至1.85元，敦沛就咁易賺咗8750萬，回報足足16.5倍。
雖然暫時只係賬面數字，不過已令敦沛高層噚日按捺不住，同華華及其他傳媒朋友報喜。
敦沛截至去年底半年，炒股炒滙炒金炒期指，都賺唔夠百萬，05年度全年亦只係賺424萬，今次入股無驚無險食鋪爆棚。