側田、關心妍（Jade）、許志安同林俊傑前晚喺將軍澳電視廣播城錄影節目《勁歌金曲》，喺星級教室環節中，側田同安仔負責教跳舞，不過安仔因早前腳傷，所以舞步都不敢太大，至於強項唱歌嘅側田，舞姿就不敢恭維。
安仔話日前同前經理人黃柏高（Paco）食飯敍舊，被雜誌影到相，佢話當晚已解釋咗只係跟Paco做專訪同敍舊，並唔係再合作，叫大家唔好諗咁多，又話同東亞仲有約喺身咁話。
着蘇永康舊褲
安仔之後又叫馮仁昭欣賞吓佢條褲嘅設計，仲話身穿嘅牛仔褲係蘇永康嘅，因為拉鏈位設計特別，所以佢特別用咗件價值萬幾蚊嘅皮褸同對方交換着。
此外，有指Paco捧新人小肥代替側田地位，側田前晚聞言即話：「好舊喇喎，呢樣嘢會發生喺每個人身上，Paco唔會偏心第二個，佢係我第二個老竇，係我恩人，我係做唱片，唔係講是非，我自己都好欣賞小肥，Paco都有叫我學吓華仔打破心結同負面嘅嘢。」
至於關心妍前晚喺節目度教日文，佢話自己嘅日文都可以同日本人溝通，有指《勁歌》已變質，並唔着重音樂，佢就話：「其實係跟潮流趨勢，𠵱家放暑假，好多學生會喺屋企睇電視，可能佢哋冇錢學嘢，睇電視學吓嘢都好。」