已經73歲高齡嘅利信達（738）主席李子彬（圖），早已退居幕後多年，不過眼見𠵱家國內經濟發展蓬勃，市場有好大發展潛力，於是佢重出江湖，再次走到幕前大展拳腳，話要趁呢個黃金機會，為股民再次謀取可觀利潤咁講。
噚日喺股東大會後，李主席同一眾記者分享佢訂下嘅目標，話要喺下半年度國內店舖業務做到同店業務增長25%，毛利率要提升6個百分點，將存貨大幅降低。佢對國內事業雄心勃勃，信心十足，仲話訂出咁高嘅目標，一定會嚇驚同行，個個都驚咗佢。至於點樣可以達到咁高目標，佢就話係商業秘密，等10月有成果時再同大家分享。
對於早前傳佢有意賣盤，佢就斬釘截鐵否認，話喺公司已經做咗30年，點會捨得賣喎！