寫自薦求職信，通常都係畢業生嘅指定動件，之不過呢啲自薦信大多石沉大海。但有位9歲外籍小朋友RuhiKumar，早前去信渣打銀行，話要求加入呢個大家庭工作，佢喺封自薦信度，話喺渣打工作係佢夢想，又好欣賞呢間銀行嘅鈔票，仲話識講普通話，如果渣打需要額外幫助，佢隨時候命咁話！
渣打（香港）行政總裁蘇利民睇咗封信，除咗親自回覆，仲邀請佢到中環渣打總行參觀，噚日Ruhi小朋友同爸爸，喺蘇利民陪同下參觀外滙資金服務嘅交易部門、私人銀行，又到訪德輔道中分行。
香港家長學嘢
雖然Ruhi今次只係參觀，但過多十年八載，到佢第日畢業，入渣打工作嘅機會一定高好多！唔知香港嗰啲對子女期望甚高嘅家長，會唔會仿效Ruhi嘅做法呢？