噚日政府拍賣黃大仙地皮，賣地前發生咗多段小插曲，好似信置主席黃志祥，一心諗住早啲到場霸個好位，點知場外有大批記者守候，見佢架車就衝埋去想訪問，嚇到黃生唔敢落車，要司機兜咗佢去附近，大熱天時自己行過嚟，認真無癮。
不過，華華就覺得佢落唔到車，可能係因為「食得太飽」。點解咁講？皆因以往投地出價好勇嘅黃志祥，今次態度冇咁積極，華華相信可能佢啱啱喺半個月內，分別喺成都同重慶啃咗幅過200萬呎嘅地皮，兩幅地總地價超過80億人仔，單計信置佔嗰份，都要畀60幾億人仔。咁食飽咗嘅人，對住美食都難再啃啦。
有入冇出 彈藥唔夠
若加埋信和之前喺香港用咗幾十億搶咗九龍塘、大埔同油麻地幾幅大地皮，大大話話，信置呢大半年喺中港兩地已用咗百幾億買地，唔知係咪有入冇出，令佢有啲飽滯，又抑或彈藥開始唔夠，黃生喺賣地全程表現得好輕鬆，無以往志在必得嗰種肉緊表情，亦甚少同隔籬咬耳仔，大部份時間坐定定，同觀眾冇乜分別。
缺少黃生呢位大好友支持，當堂令噚日賣地失色，加上其他發展商包括長實、恒地同恒隆又唔玩，庫房自然收少好多。
[email protected]