最近賣地都唔少得餘興節目──抗議人士吶喊反對起屏風樓。環保團體沒完沒了咁啄實發展商，要求唔好起屏風樓，噚日都有去灣仔新伊館賣地場。呢啲場面，又點少得立法會議員梁國雄「長毛」，佢加入踩場行列，喺場內大叫「官商勾結」、「反對興建屏風樓」口號。
環保團體同長毛直踩入場館哦啲發展商兼派傳單，黃志祥都有接，仲好認真咁睇㖭，而小超人李澤鉅就有助手幫佢接過。咁除咗黃志祥因為「太飽」，其他發展商有冇因為咁而影響心情，冇咗mood競投，搞到塊地較最高估值嘅46.8億銀，少收咗成7億呢？冇人知！華華只知長毛喺場內嗌咗口號冇耐，就俾保安勒令離場。
長毛話，近排好多地區包括大圍、大角嘴、沙田、大埔居民投訴屏風樓問題，可見問題已不容忽視，佢仲義正嚴詞話，發展局局長林鄭月娥要制止呢個情況，遲吓就會搵對方公開辯論咁話。