幾十年來最令人感動嘅一場足球賽事，一定係今屆亞洲盃決賽，由伊拉克對沙地阿拉伯，結果伊拉克贏咗一比○，歷史上第一次奪標。賽前被睇好嘅沙地曾經喺一九八四、一九八八、一九九六年攞亞洲盃冠軍，輸番一次，相信唔會太難過。我哋中國贏過亞洲盃未呢？記憶之中就冇嘞，以前「中華民國」由香港足球員做代表嘅年代，曾贏過亞運金牌，好似未在亞洲盃威過。由中華人民共和國足球隊出賽之後，亦未捧過盃。今年中國隊只係在第一場係威係勢，贏馬來西亞五比一，之後在領先二比○嘅優勢之下，俾伊朗逼和，再輸○比三畀烏茲別克，咁就拜拜咗，表現令中國球迷非常失望，十三億人之大國竟然冇法子搵到十一個球員衝出亞洲。
伊拉克國內形勢之惡劣，世人皆知，汽車炸彈爆炸，幾乎無日無之，國內無寸土安全，於亞洲盃開賽前八個星期，先至搵齊球員，到約旦集訓，由巴西教練JorvanVieira教導。呢班人分別來自遜尼派、什葉派、庫爾德族（要求離開伊拉克獨立），平時呢三大派別在政治上、軍事上打生打死，互不相讓，但球員成為隊友後，放下一切歧見，上下一心，為國效勞，誓要為苦難的祖國、苦難的人民帶回光榮，送上歡愉，不論光榮與快樂是怎麼樣的短暫，眾志成城之下，竟然創造奇蹟。
伊拉克隊在球場上戰勝南韓入決賽，代價係五十條人命，全無人性嘅恐怖分子在首都巴格達向慶祝群眾放自殺式炸彈。贏咗亞洲盃之後，全國歡騰，人民上街慶祝，會唔會又死一百幾十人呢？為球賽而賠上咁多性命，歷史上未見過，但伊拉克年青人話：「一定要上街慶祝，不向炸彈威脅屈服！」
孟子話，生於憂患，死於安樂，用之於伊拉克與中國球隊，最為貼切。左丁山睇咗兩場伊拉克比賽，深為感動，成為伊拉克擁躉。老實講，亞洲盃嘅水準並不高，頂多係樸茨茅夫嘅水平，但各隊球員之拼勁（中國隊除外），值得鼓掌支持，伊拉克奪得冠軍，更加係神話變成現實。