前兩日介紹完法拉利嘅積木車，今日介紹嘅依然係車，不過就唔係法拉利而係勁似AudiTT嘅積木跑車，對愛砌車之人嚟講，絕對係其中一個必砌項目，事關呢部車連跑車在內可以有三款變化，咁咪仲勁過《變形金剛》囉！
記者：梁美甜
攝影：伍慶泉
三合一勁過《變形金剛》
積木發燒友阿清除了Show過之前部法拉利外，今日仲Show埋另一款珍藏出嚟，當佢攞部車出嚟嗰陣，我第一時間就問係咪AudiTT，佢一臉茫然，完全唔明我講啲咩，只係好坦誠咁話：「呢部係跑車囉！」咁又係，部車都無講明係Audi，只係我主觀覺得佢勁似啫，尤其係圓頭圓尾兼有電鍍邊跑車Seat位，同TT幾似，不過包裝盒都寫明係RoaringRoadster，即係跑車囉！「呢部車美國唔出㗎啦，要搵就要喺其他國家至得！」阿清解釋嘅時候，我見盒面有個「3in1」嘅Mark，而且有三個車款，即係話呢部車可以「變形」啦！「係呀！可以砌拖拉車、四驅車同呢款跑車㗎！」咁點解揀呢款砌呢？「因為佢可以前後開冚，睇得到入面Engine同零件，好得意！」阿清開心地邊示範邊解釋畀大家知。
黑灰勁難搞
問到砌車最難係咩，阿清第一個反應係：「睇說明書囉！」照計說明書清楚講明邊件砌落邊件，再仔細咁教埋點嵌，點會難呢？「簡單嘅模型就係！但砌啲結構複雜、零件多嘅模型時，好多組件喺說明書入面都係黑灰色，深色少少可能已經講緊第二嚿組件，所以隨時撈亂㗎！」咁用咗幾耐至砌起呢部TT呢？「三個鐘左右啦！」吓？都好快啫！
RoaringRoadster（編號：4896）
特色：車長約30.4cm，931片積木，三合一，可砌跑車、拖拉車及四驅車。
查詢：磚門店 81055998