今年暑假真係熱到我日日着吊帶衫加短裙仔，都覺得好熱，所以計劃去台灣山區避暑。以前去親都係九份、烏來咁，都覺得有啲悶。噚日搵台灣觀光協會啲老友問吓呢排有咩嘢新景點。老友話，8、9月係台灣金針花季，而最佳賞花地係台東嘅太麻里鄉，黃澄澄嘅金針花開滿山谷（圖），靚到暈。
金針就食得多，乜原來可以當花咁賞？老友話，金針屬百合科，色澤金黃，因呈針狀而得名。古名更加有意思，叫萱草，遊子出遠門會喺屋前種金針，希望阿媽唔好憂愁，故又名忘憂。金針花只係開花一天，又有一日美人之稱。喺8月花季，太麻里成個山都係金針花，村民將部份金針摘落嚟放喺屋頂咁曬，山上黃花迎風搖曳，山下金針遍地鋪曬，蔚為奇觀。
老友話，太麻里鄉嘅金針花季活動即日起至8月31日，喺金針山休閒農場有金針握壽司競食比賽、人體彩繪辣妹走秀，重頭戲梗係搭賞花專車環山賞花，每日嘅早上7點50分到下午5點，平均每20分至30分有一班。活動網頁 http://www.taimali.gov.tw/tml/travel/index.html。
逢周一至周四刊出