「中東股神」沙地阿拉伯王子阿爾瓦利德（Al-WaleedbinTalal）投資眼光獨到就係人都知，手上愛股包括美國上市嘅蘋果、花旗、可口可樂，遠至本港掛牌嘅H股都有，仲獨愛IPO時入飛，其中招行、中交都已經升到火箭咁，中行、工行就齊齊成為藍籌新貴。近期上市嘅新股王復星幾乎都係佢嘅囊中物，不過沙地王子堅守「賺到盡」嘅原則，竟然嫌分配比例太少，將放到埋嘴邊嘅肥豬肉都一手fing走。
內地《證券日報》最近獨家訪問咗沙地王子心腹──投資旗艦KHI首席執行官薩麥德佐克，探討王子嘅投資心得。薩麥德佐克話，當沙地王子知道透過國際配售，先分到價值2.34億港銀嘅復星（約2535萬股或5.07萬手），原本都諗住做策略投資者嘅，但係都唔太滿意分貨太少，所以對復星sayno。曾經連升9個交易日嘅復星真係交足功課，比招股價升近五成，雖然噚日港股急瀉，但復星只係輕輕下跌6毫子，按招股價計，王子認頭嘅話，都賺差唔多1.2億，相反，中行跌幅雖然較細，跌咗一毫半，不過就令王子蒸發咗1.5億銀，睇嚟王子真係唔志在嗰一兩億銀。
1億銀都唔賺
王子say句no就跌咗1億銀，但係復星副董事長兼總裁梁信軍曾透露，𠵱家傾緊某位中東投資者共同成立私募基金，向資產管理邁進；一直就有傳聞話嗰位中東投資者就係沙地王子，不過至今都未能證實。唔通王子早有後着，先毅然sayno？
曾經揚言「投資中國無上限」嘅沙地王子，除咗大舉參與H股，仲已經喺內地收購酒店，目標3至5年內，喺二三線城市興建10至15家酒店。但係點解獨愛二三線城市呢？薩麥德佐克就透露，內地政府準備將經濟重心放喺二三線城市，市場將有極高增長，增長速度仲會遠遠拋離整體經濟。嘩，估唔到王子同內地高官都咁好關係喎。
[email protected]