求職網站Vault.com做咗個「2007年辦公室戀情」調查，結果有17%受訪者承認曾經喺公司幽會，遠多過舊年嘅2%；地點包括董事會議室、樓梯、工程實驗室、茶水室、老闆辦公室等。
17%曾經幽會
網站創辦人奧德曼話：「員工越嚟越夠膽喺公司談戀愛，仲唔怕俾人發現戀情。」
美國人力資源管理學會（SHRM）人力資源主管基爾里女士搞笑咁話：「下次入辦公室前記得先敲門，以免見到啲尷尬場面。」
專家指出家陣潮流興遲婚，公司入面唔少職員仲未結婚，加上越嚟越多女性出嚟打工，有更多機會同男同事一齊做嘢，令辦公室越嚟越多羅曼史。
有網友喺《Gamehit討論區》話：「辦公室談戀愛好處多籮籮，因為同愛人朝夕相對，可以更了解對方，工作時亦會特別起勁；又唔使早起身送對方返工，放工後亦唔使趕住接女友，慳番好多寶貴時間。」
小心樂極生悲
不過，佢都話辦公室戀情會有唔少惡果：
（1）導致婚外情，對方嘅「黃面婆」會上嚟找晦氣；
（2）朝夕相對，見得多都厭；
（3）唔專心工作，令上司不滿；
（4）假如公司唔准同事談戀愛，隨時會被炒魷；
（5）戀人如果係業務競爭對手，唔知應唔應該贏對方；
（6）成日偷偷摸摸拍拖，會好辛苦；
（7）對方如果知道你人工高過佢，可能會唔開心；
（8）同下屬約會，會俾人投訴你徇私；
（9）一旦分手，大家會面左左，好冇癮。