我求大俠讀書唔叻，但1米78嘅身形，10年前行出街都自以為高「材」生；今日睇見下一代越生越高，出外簡直無地自容……原則上，下一代食得擦得，高過自己正常不過，但巴塞隆拿新兵耶耶托尼大爆，佢哋3兄弟位位身高超過1米83，都矮過父母一大截，認真撲朔迷離！
耶耶托尼矮8厘米
嚟自西非科特廸瓦嘅耶耶托尼，高1米87、着45號鞋、身形健碩、速度唔曳，巴塞就係睇中其絕佳先天條件，今夏隨即以1,000萬歐元（約1.1億港元）由法甲摩納哥羅致旗下。耶耶托尼今年24歲，理論上經已發育完成，即使身高唔及隊友域陀華廸斯、亨利，但喺足球場上亦算係高佬一名，點知佢日前爆響口：「我老竇老母仲高呀！」
托尼兄弟除咗耶耶托尼，阿仙奴守將高路托尼、尼斯前鋒伊巴謙托尼都有1米83以上嘅身高，根據遺傳論，「我們仨」嘅父母理應高人一等，點知俾傳媒一問之下，原來更係高聳入雲嗰隻！
西非物產可能比較豐裕，據講當地出產極多「黑色巨塔」，尼日尼亞中部一帶更隨處見到1米90以上嘅「高樓大廈」，而「我們仨」嘅爸爸就身高達1米95，連媽咪都有成1米90咁高，確係唔講得笑！大家唔好誤會，托尼父母都唔係運動員，前者仲做緊消防員，而母親不過係普通家庭主婦而已，不過我求大俠只係奇怪點解托尼兄弟冇一個高過自己父母嘅？