剛公佈中期業績嘅獅子銀行，交咗盤超出市場預算嘅靚數，各管理層自然更有心情，出嚟同傳媒傾偈，好似今年2月，出任滙豐香港保險業務董事總經理一職嘅石湛森（JasonSadler），噚日就首次跟部份本地記者見面。大笨象講到明，保險業務係集團未來增長明燈，而香港呢塊福地，就特別旺獅子行，據石兄講，截至上半年計，香港區嘅保險貢獻已經跑贏倫敦，躍居首位。
呢位香港保險新阿頭，青年才俊，溫文爾雅，曾經派駐南美新興市場，滙豐入股平保一役，佢就負責「DD」（盡職審查），加入滙豐前，曾先後任職蘇黎世金融同法國AXA保險集團，係名副其實嘅保險業專才，啱晒滙豐要5年將保險盈利翻一番嘅要求。
華華側聞，原來佢老哥今個月底，會飛返倫敦小登科，真係可喜可賀，石兄又煮得一手好菜，太座肯定可大飽口福矣。