所謂近廚得食，食日本菜我一向堅持這個信念，食刺身壽司要坐壽司吧，食日式鐵板燒要坐爐頭位，既可昅實師傅的烹調技巧和用料新唔新鮮，更可即整即食，熱辣辣嚐第一口鮮！最近新開的春日鐵板燒，正合乎我的要求，師傅一邊煮一邊同客人傾兩句，還會臨場拋樽舞刀玩兩招，單是一味生煎龍蝦，未吃已看得人拍案叫絕！
記者：甘露露
攝影：林栢鈞
這裏是真正以日式鐵板燒做主打的專門店，有別於一般街頭巷尾的日本料理而兼做鐵板燒那種。甫入店，已見3大張半圓形和U形的鐵板燒枱，枱與枱之間非常闊落，還有一張長長的壽司枱，雖說是日本鐵板燒，但全店卻以木和石作為主要裝飾，裝潢時尚，燈光柔和。
「吃飯是一種社交生活，所以我們希望客人品嚐美食之餘，也坐得舒服，即使十多位客人一齊坐，傾偈都很方便。」餐廳經理Eric表示。
火光熊熊 十足雜技
裝修摩登，但菜式做法和用料卻非常地道，餐廳所有材料和調味料佔7成由日本運來，連鐵板燒的烹調方法亦依足日式傳統古法來做，如一道鐵板燒龍蝦，一般餐廳貪方便，會先將龍蝦劏好再開邊，然後才放在鐵板上烹調；這裏的做法卻是生煎原隻龍蝦，即將原隻生猛的龍蝦放在鐵板上煎一煎，待蝦肉開始離殼，再用刀和叉以極速把頭和身分開，再將原隻蝦身起出來煎至剛熟，由於做法繁複且講求技巧，所以很少有餐廳會這樣做，堪稱只此一家。
Eric又話，全港女鐵板燒師傅不多，好似Susan可以一邊做鐵板燒一邊用刀叉、鑊鏟同胡椒罌玩雜技的就更加係少之又少，所以喺享受美味龍蝦嘅同時，記得細心欣賞Susan的鐵板燒功架啦！
來自日本的 季節刺身
此店除鐵板燒外，還有多款時令刺身。「刺身全部由日本築地、北海道、九州等地運來，1個星期返貨4至5次，全部都係最時令的當造海鮮。」刺身師傅輝哥稱。除日本外，還有其他來自各地的海鮮如加拿大安格利斯蟹、南中國海蜆等，其中有些更可選擇做鐵板燒或刺身。
鐵板燒龍蝦
$480起/隻（視乎大小而定）
龍蝦肉火候拿揑得好，嫩滑爽甜兼備。入口有甘甜的蝦膏香，食落有淡淡的黑椒香，味道層次非常分明；值得一讚的是用蝦膏煮的汁，加入了牛油和生熟蒜茸後，吊出龍蝦的鮮甜味。蝦頭可用來煮粥，每碗$30。
鐵板高野鵝肝餐
$488/（2位用）
晚市套餐包括有法國南部的鵝肝、銀鱈魚、安格斯牛柳、炒麵或炒飯、餐湯同沙律。鵝肝先用鐵板燒香，再淋上大廚秘製的日式高野汁，入口即化。牛柳用最頂級的，先把牛扒煎一煎，再淋上白蘭地酒點火一燒，猛火將肉汁封鎖，最後切粒撒鹽和黑椒調味，牛柳粒外層帶脆，入口juicy腍滑。
魴魚刺身
$250起/條
5月至8月是這種魚的當造季節，吃時蘸些師傅自家調配的酸汁，酸香汁味和魚的鮮甜味夾到絕，酸汁更突顯魚的鮮甜。
春日鐵板燒（31157550）
地址：尖沙嘴漆咸道南53-55號嘉芙中心2樓全層（座位80個）
營業時間：12:00nn-3:00pm、
6:00pm至11:00pm
